డ్యాన్స్‌కు బ్రాండ్ అంబాసిడర్.. శివశంకర్ మాస్టర్: కోలుకుంటారని భావించినా, చివరికి.. రాజకీయ నేతల దిగ్భ్రాంతి!

ప్రముఖ సినీ నృత్య దర్శకుడు మృతిపై రాజకీయ, సినీ ప్రముఖులు సంతాపం తెలుపుతున్నారు. శివశంకర్ మాస్టర్ మరణం బాధాకరమని మాజీ ముఖ్యమంత్రి చంద్రబాబునాయుడు అన్నారు. శివశంకర్ మాస్టర్ మృతితో సినీ పరిశ్రమ కళామతల్లి ముద్దుబిడ్డను కోల్పోయిందన్నారు. ఆయన ఆత్మకు శాంతి చేకూరాలని దేవుడిని ప్రార్థిస్తున్నానని చంద్రబాబు చెప్పారు. శివశంకర్ కుటుంబ సభ్యులకు తన ప్రగాఢ సానుభూతి తెలిపారు. అలాగే, డ్యాన్స్ మాస్టర్ శివశంకర్ మాస్టర్ కన్నుమూయడం బాధాకరమని జనసేన పార్టీ అధినేత పవన్ కళ్యాణ్ పేర్కొన్నారు. కోవిడ్ మూలంగా ఆస్పత్రిలో చికిత్స పొందుతున్నారు.. కోలుకుంటారని భావించానని చెప్పారు. కానీ, మాస్టర్ మరణం కలిచివేసిందన్నారు. శివశంకర్ మాస్టర్ కుటుంబానికి ప్రగాఢ సానుభూతి తెలియజేస్తున్నానని చెప్పారు. శాస్త్రీయ నృత్యంలో పట్టు ఉన్న ఆయన సినీ నృత్యంలో ఆ పరిజ్ఞాన్ని మేళవించారని.. ప్రేక్షకులను మెప్పించారని తెలిపారు. రామ్ చరణ్ సినిమా మగధీరలో శివశంకర్ మాస్టర్ నృత్యరీతులు అందించిన పాట ప్రేక్షకులకు సంతోషాన్ని ఇవ్వడమే కాకుండా జాతీయస్థాయి పురస్కారాన్ని పొందిందని పవన్ కళ్యాణ్ గుర్తు చేశారు. వందల చిత్రాల్లోని పాటలకు తన కళ ద్వారా నృత్యరీతులు అందించిన శివశంకర్ మాస్టర్ ఆత్మకు శాంతి చేకూరాలని భగవంతుణ్ని ప్రార్థిస్తున్నానని పేర్కొన్నారు. అలాగే, శివశంకర్ మాస్టర్ మరణంపై రాష్ట్ర బీజేపీ అధ్యక్షుడు సోము వీర్రాజు దిగ్భ్రాంతి వ్యక్తం చేశారు. ‘‘800కు పైగా చిత్రాలకు కొరియోగ్రాఫర్‌గా పని చేసి తనకంటూ ఒక ప్రత్యేకమైన గుర్తింపును సంపాదించుకుని జాతీయ చలనచిత్ర అవార్డు పొందిన శివశంకర్ మాస్టారు గారి మరణం చాలా బాధాకరం. వారి ఆత్మకు శాంతి చేకూరాలని, వారి కుటుంబ సభ్యులకు మనోధైర్యాన్ని ప్రసాదించాలని భగవంతుడిని ప్రార్థిస్తున్నాను.’’ అని సోము వీర్రాజు పేర్కొన్నారు. ‘‘ప్ర‌ఖ్యాత నృత్య దర్శకుడు విచార‌క‌రం. ద‌క్షిణాది చిత్ర‌సీమ‌లో ఎన్నో చిత్రాల‌కు నృత్య‌రీతుల్ని స‌మ‌కూర్చి లెక్క‌లేన‌న్ని అవార్డులు సొంతం చేసుకుని, డ్యాన్స్‌కి బ్రాండ్ అంబాసిడ‌ర్‌లాంటి మాస్ట‌ర్ మ‌ర‌ణం చిత్ర‌ప‌రిశ్ర‌మ‌కి తీర‌నిలోటు. ఆయ‌న కుటుంబ‌స‌భ్యుల‌కు నా ప్ర‌గాఢ సంతాపం తెలియ‌జేస్తున్నాను.’’ అని నారా లోకేష్ దిగ్భ్రాంతి వ్యక్తం చేశారు. కాగా, గత కొద్ది రోజులుగా కరోనాతో బాధపడుతున్న శివశంకర్ మాస్టర్.. పరిస్థితి విషమించడంతో ఆదివారం రాత్రి 8 గంటల సమయంలో కన్నుమూశారు. ఇటీవల కరోనా బారిన పడిన దగ్గర నుంచి మాస్టర్‌ ఆరోగ్యం విషమించిచడంతో ఏఐజీ ఆస్పత్రికి తరలించారు. ఊపిరితిత్తులకు 75 శాతం ఇనెఫెక్షన్ సోకడంతో డాక్టర్లు ఎమర్జెన్సీ విభాగంలో చికిత్స అందించారు. మరోవైపు శివశంకర్ మాస్టర్ భార్య, పెద్ద కుమారుడికి కూడా కరోనా సోకింది. ఇక మాస్టర్ చిన్న కుమారుడు అజయ్ కృష్ణ తన తండ్రి, అన్న, అమ్మ బాగోగులు చూసుకుంటూ వచ్చారు. ఆర్థిక పరిస్థితి సరిగ్గా లేకపోవడంతో టాలీవుడ్, కోలీవుడ్ డ్యాన్స్ మాస్టర్స్, హీరోలు.. మాస్టర్ కుటుంబానికి సాయం చేశారు. ఎప్పటికప్పుడు ఆయన ఆరోగ్య పరిస్థితిపై డాక్టర్లను అడిగి వివరాలు తెలుసుకుని.. మెరుగైన చికిత్స అందించాలని కోరారు. మాస్టర్ కన్నుమూయడంతో సినీ పరిశ్రమలో విషాద ఛాయలు అలుముకున్నాయి. ఇక మెగాస్టార్ చిరంజీవి, సోనూసూద్, హీరో ధనుష్, మంచు విష్ణు, లారెన్స్ శివశంకర్ మాస్టర్ కుటుంబానికి ఆర్థిక సాయం చేశారు. శివ శంకర్ మాస్టర్ ఈ లోకాన్ని విడిచి వెళ్ళిపోయారని తెలిసి సినీ ప్రముఖులు దిగ్భ్రాంతి వ్యక్తం చేస్తున్నారు. భారత చలనచిత్ర పరిశ్రమలో 10 భాషల్లో పనిచేసిన అనుభవం శివశంకర్ మాస్టర్ సొంతం. 800 పైగా సినిమాలకు శివశంకర్ మాస్టర్ కొరియోగ్రఫీ అందించారు. దాదాపు 30 సినిమాల్లో శివశంకర్ మాస్టర్ నటించారు. బహుముఖ ప్రజ్ఞాశాలిగా గుర్తింపు తెచ్చుకున్న శివశంకర్‌ మాస్టర్‌.. చెన్నైలో పుట్టారు. సలీమ్‌ మాస్టర్‌ దగ్గర శిష్యరికం చేశారు. 2011లో మగధీర చిత్రానికి శివశంకర్ మాస్టర్ జాతీయ పురస్కారాన్ని అందుకున్నారు.