చిత్తూరు: మొబైల్‌కు మెసేజ్.. రూ.13 లక్షలు ఫట్, ఇలా కూడా మోసం చేస్తారా!

చిత్తూరు జిల్లాలో మోసానికి పాల్పడిన ఓ వ్యక్తిని పోలీసులు అరెస్ట్ చేశారు. పోలీసులు శనివారం ఢిల్లీ వెళ్లి అరెస్టు చేశారు.. ఆన్‌లైన్‌ లాటరీ పేరిట రూ.లక్షలు లూటీ చేసినట్లు తేల్చారు. నగరి ప్రాంతానికి చెందిన మహిళకు ఉగాండ దేశానికి చెందిన నెల్సన్‌ హోగ్గర్‌ గతేడాది అక్టోబరులో ఓ మెసేజ్ పంపాడు. ఓ మొబైల్ కంపెనీ నిర్వహించిన లాటరీలో రూ.2.5 కోట్లు, ల్యాప్‌టాప్‌, ఇతర ఎలక్ట్రానిక్స్‌ వస్తువులు గెలుచుకున్నారని చెప్పుకొచ్చాడు. ఆమె కూడా నిజమని నమ్మింది. మొదట పార్సిల్‌ సర్వీసుకు రూ.3,500, తర్వాత బ్యాంకు అకౌంట్ నిర్వహణకు రూ.15వేలు, ట్యాక్స్ పేరిట రూ.40 వేలు వసూలు చేశాడు. బాధితురాలు ఇల్లు, నగలు సైతం తాకట్టు పెట్టి మొత్తం రూ.13.98 లక్షలు చెల్లించారు. ఆమె చివరకు మోసపోయాని గ్రహించి.. మూడు నెలల క్రితం ప్రాణాలు తీసుకునేందుకు ప్రయత్నించారు. నగరి పోలీసులు కేసు నమోదు చేసి దర్యాప్తు చేశారు. ఎస్పీ సెంథిల్‌ కుమార్‌ ఆదేశాల మేరకు పుత్తూరు డీఎస్పీ ప్రత్యేక పోలీసు బృందాన్ని ఢిల్లీకి పంపారు. అక్కడి పోలీసుల సహకారంతో శనివారం నిందితుడి ఇంటిని గుర్తించి అరెస్టు చేశారు. అతడ్ని నగరికి తీసుకొస్తున్నారు. ఇలా మొబైల్స్‌కు వచ్చే మెసేజ్‌లు, ఆన్ లైన్ ఆఫర్ల విషయంలో జాగ్రత్తగా ఉండాలని పోలీసులు హెచ్చరిస్తున్నారు