ఏపీకి మరోసారి వాన ముప్పు.. ఈ జిల్లాలకు అలర్ట్

గులాబ్ తుఫాన్ నుంచి కోలుకుంటున్న వేళ ఏపీకి మరోసారి వాన ముప్పు పొంచి ఉంది. వాయవ్య బంగాళాఖాతం, దానిని ఆనుకుని ఉన్న పశ్చిమ బెంగాల్‌ తీరంలో మరో అల్పపీడనం ఏర్పడింది. ఇది రానున్న 24 గంటల్లో బలపడనుందని వాతావరణ కేంద్రం తెలిపింది. ఈ ప్రభావంతో వచ్చే 48 గంటల్లో రాష్ట్రంలోని పలు ప్రాంతాల్లో ఉరుములు, మెరుపులతో కూడిన తేలికపాటి నుంచి ఒక మోస్తరు వర్షాలు కురిసే అవకాశం ఉందని అంచనా వేస్తున్నారు. విశాఖ, తూర్పుగోదావరి జిల్లాల్లో పలుచోట్ల భారీ వర్షాలకు అవకాశం ఉంది. మరోవైపు గులాబ్‌ తుపాను ప్రభావంతో కోస్తాలో పలుచోట్ల మంగళవారం కూడా వర్షాలు కురిశాయి. రాష్ట్ర వ్యాప్తంగా సగటున 7.1 మి.మీ. వర్షపాతం నమోదైంది. అంతేకాదు గులాబ్‌ తుఫాన్‌ కోస్తాను ముంచేసింది. రాష్ట్రంలోని కోస్తా జిల్లాల్లో కుంభవృష్టి కురిసింది. శ్రీకాకుళం, విజయనగరం, విశాఖపట్నం, ఉభయ గోదావరి, కృష్ణా, గుంటూరు జిల్లాల్లో తెల్లవారుజాము నుంచి మధ్యాహ్నం వరకు ఎడతెరిపి లేకుండా వాన పడింది. వాగులు, వంకలు పొంగిపొర్లుతున్నాయి. నదులు ఉధృతంగా ప్రవహిస్తున్నాయి.పంటలు నీట మునిగాయి. ఈదురుగాలుల బీభత్సానికి వందలాది విద్యుత్‌ స్తంభాలు, చెట్లు నెలకొరిగాయి.