టాలీవుడ్‌ డ్రగ్స్ కేసులో ఎన్‌ఫోర్స్‌మెంట్‌ డైరెక్టరేట్‌(ఈడీ) మంగళవారం నుంచి విచారణ మొదలుపెట్టనుంది. ఈ కేసులో ఆరోపణలు ఎదుర్కొంటున్న 12 మంది సెలబ్రెటీలకు కొద్దిరోజుల క్రితమే ఈడీ నోటీసులు జారీచేసిన సంగతి తెలిసిందే. ఈ నేపథ్యంలోనే నేటి(ఆగస్టు 31) నుంచి సెప్టెంబర్ 22వ తేదీ వరకు వారందరినీ హైదరాబాద్‌లోని ఈడీ కార్యాలయంలో వేర్వేరుగా ప్రశ్నించనుంది. ఈ కేసులో ఈడీ ఫోకస్ మొత్తం డ్రగ్స్ లావాదేవీల్లో జరిగిన మనీ లాండరింగ్‌పైనే ఉంది. దీంతో ఆ కోణంలోనే సెలబ్రెటీలపై ప్రశ్నల వర్షం కురిపించే అవకాశముంది. ఈ కేసుకు సంబంధించి ప్రముఖ దర్శకుడు మంగళవారం ఈడీ ముందు హాజరుకానున్నారు. నటుడు నవదీప్‌కు చెందిన ఎఫ్‌-క్లబ్‌ పబ్‌ నుంచి పూరీకి డ్రగ్స్ అందినట్లు ఎక్సైజ్‌ అధికారుల విచారణలో బయటకు వచ్చింది. ఈ కేసులో హీరోయిన్‌ రకుల్‌ ప్రీత్‌ సింగ్‌, నటులు రానా, రవితేజ తదితరులకు సైతం ఈడీ నోటీసులు జారీ చేసిన సంగతి తెలిసిందే. ఈ నేపథ్యంలో సెప్టెంబరు 2న చార్మీ, 6న రకుల్‌, 8న రానా, 9న రవితేజ, ఆయన డ్రైవర్‌ శ్రీనివాస్‌, 13న నవదీప్‌, ఎఫ్‌-క్లబ్‌ పబ్‌ జనరల్‌ మేనేజర్‌, 15న ముమైత్‌ఖాన్‌, 17న తనీష్‌, 20న నందు, 22న తరుణ్‌ విచారణకు హాజరుకావాలని ఈడీ ఆదేశించింది. డ్రగ్స్ కొనుగోలుకు సంబంధించి సెలబ్రెటీలు ఫెమా నిబంధనలు ఉల్లంఘించి విదేశాలకు పెద్దమొత్తంలో నిధులు మళ్లించినట్టు ఈడీ ప్రాథమికంగా గుర్తించింది. ఈ నేపథ్యంలో డ్రగ్స్ కొనుగోలుకు నగదును ఎలా పంపారు? అసలు నగదు లావాదేవీలు ఎలా జరిగాయి? అనే కోణంలో విచారణ జరగనుంది. దీనికి సంబంధించి గతంలో అరెస్ట్ అయిన నిందితులతో పాటు, ఎక్సైజ్‌ అధికారుల నుంచి ఈడీ సమాచారం సేకరించింది. ఈ కేసులో మొత్తం 62 మందిని ఎక్సైజ్‌ అధికారులు గతంలో విచారించారు. సినీ ప్రముఖుల విచారణ పూర్తయిన తర్వాత.. మిగిలిన వారందరికి నోటీసులు పంపి ప్రశ్నించాలని ఈడీ భావిస్తున్నట్లు తెలుస్తోంది.
0 Comments