సెప్టెంబర్ 1 నుంచి రాష్ట్రవ్యాప్తంగా విద్యాసంస్థలు మళ్లీ తెరుచుకోనున్నాయి. ఈ నేపథ్యంలోనే రాష్ట్ర ప్రభుత్వం కీలక నిర్ణయాలు తీసుకుంది. ప్రైవేట్ పాఠశాలల్లో కూడా ఆన్‌లైన్‌ తరగతులు ఉండవని, కేవలం ప్రత్యక్ష బోధనే ఉండాలని ప్రభుత్వం అంతర్గతంగా నిర్ణయించింది. అయితే ఆ విషయాన్ని స్పష్టం చేస్తూ ఇప్పటివరకు ఉత్తర్వులు ఇవ్వకపోవడం గమనార్హం. ఇటీవల ప్రభుత్వం ఇచ్చిన జీఓలో, పాఠశాల విద్యాశాఖ ఇచ్చిన మార్గదర్శకాల్లోనూ ఆ విషయాన్ని స్పష్టం చేయలేదు. అధికారులు మాత్రం ఒకటో తేదీ నుంచి ప్రత్యక్ష బోధన ప్రారంభం అంటే ఆన్‌లైన్‌ ఉండదనే కదా అర్థం అని వ్యాఖ్యానిస్తున్నారు. ఇంటర్‌ విద్యాశాఖ ఇప్పటికే టీశాట్‌ అధికారులకు తమ టీవీ పాఠాలను నిలిపివేయాలని కోరింది. అయితే పాఠశాల విద్యాశాఖ మాత్రం అధికారికంగా తమకు సమాచారం పంపలేదని టీశాట్‌ వర్గాలు చెబుతున్నాయి. ప్రైవేట్ పాఠశాలలు ఆన్‌లైన్‌ కూడా కొనసాగిస్తే ఏం చర్యలు తీసుకుంటారని ఉన్నతాధికారి ఒకరిని ప్రశ్నించగా.. ప్రభుత్వ నిర్ణయాన్ని వెల్లడించాం.. వాటిని ఉల్లంఘిస్తే అప్పుడు తగిన చర్యలుంటాయని చెబుతున్నారు. ఎక్కువమంది విద్యార్థులుంటే ఆ పాఠశాల యాజమాన్యం షిఫ్టు విధానంలో బడులను నడుపుకునేందుకు విద్యాశాఖ అనుమతిచ్చే అవకాశం ఉన్నట్లు తెలుస్తోంది. మరోవైపు విద్యార్థుల హాజరు తప్పనిసరి చేయబోమని, పిల్లలను బడికి పంపాలని బలవంతం చేయవద్దని ప్రభుత్వం చెబుతూనే.. మరోవైపు ఆన్‌లైన్‌ బోధనకు అనుమతి లేదంటూ ప్రభుత్వం గందరగోళ ప్రకటనలు చేస్తోందని ప్రైవేట్ పాఠశాలల యజమానులు కొందరు ఆందోళన వ్యక్తం చేస్తున్నారు. ప్రభుత్వ పాఠశాలలను కరోనా నిబంధనల మేరకు నడిపేందుకు తీసుకునే చర్యలపై విద్యాశాఖ మంత్రి సబితా ఇంద్రారెడ్డి సోమవారం డీఈఓలతో ఆన్‌లైన్‌ సమావేశం జరపనున్నారు. ఇటీవల పాఠశాల విద్యాశాఖ ఇచ్చిన మార్గదర్శకాల్లో కొన్ని అంశాలు అస్పష్టంగా ఉన్నాయన్న విమర్శలు వస్తున్న నేపథ్యంలో వాటిలో మార్పులు, చేర్పులు ఉండొచ్చని తెలుస్తోంది.
0 Comments