ప.గో జిల్లా: ప్రియుడికి దిమ్మ తిరిగే షాకిచ్చిన యువతి

పశ్చిమగోదావరి జిల్లాలో ప్రియుడికి యువతి షాకిచ్చింది. ఏడేళ్లుగా ప్రేమిస్తున్నా పెళ్లికి నిరాకరిస్తుండటంతో వాటర్‌ ట్యాంక్‌ ఎక్కింది. పోలీసులు రంగంలోకి దిగి ప్రియుడికి కౌన్సెలింగ్‌ ఇవ్వడంతో పెళ్లికి ఒప్పుకున్నాడు.. యువతి కిందికి దిగి రాగా వారిద్దరికి దండలు మార్పించి పెళ్లితో శుభం కార్డు పడింది. 18వ వార్డు బెత్లహంపేటకు చెందిన యువతి, గాంధీనగర్‌ కాలనీకి చెందిన యువకుడితో ఏడేళ్లుగా ప్రేమలో ఉన్నారు. తనను పెళ్లి చేసుకోవాలని యువతి ప్రియుడు మొహం చాటేశాడు. రెండు రోజుల క్రితం యువతి బంధువులు పోలీస్‌స్టేషన్లో ఫిర్యాదు చేయగా యువకుడు రెండు రోజులు గడువు కోరాడు. గడువు ముగిసినా ఏ విషయం చెప్పకపోవడంతో యువతి తనకు న్యాయం చేయాలంటూ అదే ప్రాంతంలో ఉన్న వాటర్‌ ట్యాంక్‌ పైకి ఎక్కింది. దీంతో బంధువులు ఆందోళనచెందారు.. పోలీసులకు ఫిర్యాదు చేశారు. వెంటనే స్థానిక సీఐ చొరవతో యువతి కిందికి దిగి రాగా.. ప్రియుడు , అతని తల్లిదండ్రులకు సీఐ కౌన్సెలింగ్‌ ఇవ్వడంతో పెళ్లికి అంగీకరించారు. స్టేషన్‌ పక్కనే ఉన్న ఆంజనేయస్వామి ఆలయంలో ప్రేమజంటకు దండలు మార్పించారు. ఏడాదిలోపు పెళ్లి చేసుకునేలా ఒప్పందం చేసుకున్నట్లు బంధువులు, స్థానిక పెద్దలు చెప్పారు.