యాదాద్రిలో విషాదం.. వరదనీటిలో కొట్టుకుపోయిన అక్కాచెల్లెళ్లు, ఒకరి మృతి

తెలంగాణలో భారీ వర్షాలు పలువురి ప్రాణాలను బలిగొంటున్నాయి. వికారాబాద్‌ జిల్లాలో ఆదివారం రాత్రి తిమ్మాపూర్‌ వాగు ఉద్ధృతికి కారు కొట్టుకుపోయిన ఘటనలో నవవధువు సహా నలుగురు ప్రాణాలు కోల్పోయిన ఘటనను మరువకముందే యాదాద్రి జిల్లాలో అక్కాచెల్లెళ్లు వరద నీటిలో కొట్టుకుపోయారు. శుభకార్యానికి వెళ్తూ మార్గమధ్యలో వాగు ఉద్ధృతిలో అక్కాచెల్లెళ్లు కొట్టుకుపోగా వారిలో ఒకరు మృతిచెందారు. ఈ విషాద ఘటన రాజపేట మండలం కుర్రారం శివారులో సోమవారం చోటుచేసుకుంది. బొందుగుల గ్రామానికి చెందిన పొన్నబోయిన ఆంజనేయులు, పద్మ దంపతులు సోమవారం శుభకార్యం చేయాలని తలచారు. దీనికి జనగామ జిల్లా దేవరుప్పల మండలం చిన్నమడూరులో నివాసముండే పద్మ చెల్లెలు గొడుగు సుజాత, మల్లికార్జున్‌ కుటుంబాన్ని తీసుకువచ్చేందుకు ఆంజనేయులు, కుమార్తె హిమబిందు ఆదివారం అక్కడికి వెళ్లారు. బొందుగులకు తిరిగివస్తున్న క్రమంలో కుర్రారం శివారులోని వాగును మల్లికార్జున్‌, సుజాత దంపతులు కారులో దాటారు. యాదగిరిగుట్టకు చెందిన శ్రవణ్‌కుమార్‌.. సింధూజ (26), హిమబిందు (23)లను బైక్‌పై ఎక్కించుకుని వాగు దాటుతుండగా సగం దూరంలో వాహనం అదుపుతప్పింది. దీంతో సింధూజ, హిమబిందు నీటి ప్రవాహంలో కొట్టుకుపోగా... శ్రవణ్‌కుమార్ క్షేమంగా ఒడ్డుకు చేరుకున్నాడు. సమాచారం అందుకున్న స్థానిక పోలీసులు గజ ఈతగాళ్లతో గాలించగా పారుపల్లి వాగు శివారులో సింధూజ మృతదేహం లభ్యమైంది. హిమబిందు ఆచూకీ ఇంకా లభించకపోవడంతో గాలింపు కొనసాగుతోంది.