కర్నూలు: ఏటీఎంలో చొరబడి.. బాబోయ్ ఏకంగా రూ.65లక్షలు

డోన్‌‌లో దొంగ రెచ్చిపోయాడు. రెండు ఏటీఎం మెషిన్లను తెరిచి భారీ చోరీ చేశాడు. శారద కాన్వెంట్‌ సమీపంలోని స్టేట్‌ బ్యాంక్‌ ఏటీఎంలో ఆదివారం రాత్రి 2.50 గంటల సమయంలో మంకీ క్యాప్, టోపీ ధరించిన గుర్తు తెలియని వ్యక్తి ఏటీఎం ముందు బయట వైపున ఉన్న సీసీ కెమెరా ధ్వంసం చేశాడు. గ్యాస్‌ కట్టర్, ఐరన్‌ రాడ్డు, వాటర్‌ బాటిల్‌ సాయంతో రెండు ఏటీఎంలను పగులగొట్టి తెరిచాడు. జాగ్రత్తగా ఏటీఎం మెషిన్లలో డబ్బును ఎత్తుకెళ్లాడు. ఈ సీన్ మొత్తం మరో సీసీ కెమెరాలో రికార్డైంది. ఆదివారం అర్ధరాత్రి నుంచి సోమవారం ఉదయం వరకు వర్షం పడటంతో ఆ దారిలో ఎవరూ వెళ్లకపోవడంతో ఈ విషయం తెలియలేదు. సోమవారం ఉదయం ఏటీఎం కేంద్రం బయట సీసీ కెమెరా పడి ఉండటాన్ని గమనించిన స్థానికులు పోలీసులకు సమాచారం ఇచ్చారు. పోలీసులు ఏటీఎంను పరిశీలించారు.. డాగ్‌ స్క్వాడ్, ఫింగర్‌ ప్రింట్‌ నిపుణులు వచ్చి ఆధారాలు సేకరించారు. బ్యాంక్‌ సిబ్బంది ఫిర్యాదుతో పోలీసులు కేసు నమోదు చేసి దర్యాప్తు చేస్తున్నారు. చోరీ చేసిన వ్యక్తి పాత నేరస్తుడా, ఏటీఎం మెషిన్ల తయారీ, మెకానిజంలో నైపుణ్యం ఉన్న వ్యక్తా అనే కోణంలో ఆరా తీస్తున్నారు. దొంగను గుర్తించేందుకు సీసీ కెమెరాల్లోని ఫుటేజీని పరిశీలిస్తున్నారు. ఈ ఏటీఎం సెంటర్‌కు రద్దీ ఎక్కువగా ఉంటుంది. ఇందులో ఉన్న రెండు మెషిన్లలో శుక్రవారం బ్యాంక్‌ అధికారులు రూ.80 లక్షల నగదు ఉంచారు. ఆదివారం రాత్రి వరకు రూ.14,55,100 నగదును వినియోగదారులు విత్‌ డ్రా చేసుకోగా.. మిగిలిన డబ్బును దుండగుడు ఎత్తుకెళ్లాడు.