ఓ మహిళా సర్పంచ్ వినూత్న నిర్ణయం తీసుకున్నారు. స్థానికంగా ఏరులై పారుతున్న సారాకు బ్రేకులు వేసేందుకు కొత్త మార్గాన్ని ఎంచుకున్నారు. నాటు సారా తయారు చేస్తున్న వారిపై కఠినంగా వ్యవహరించాలని నిర్ణయించారు. స్థానికంగా సారా తయారు చేసేవారు, విక్రయించే వారి వివరాలు చెప్పే వారికి బంపరాఫర్ ప్రకటించారు. అందరి నుంచి ప్రశంసలు అందుకుంటున్నారు. చిత్తూరు జిల్లాలో, అది కూడా ఏపీ డిప్యూటీ సీఎం, ఎక్సైజ్ శాఖ మంత్రి నారాయణ స్వామి సొంత నియోజకవర్గంలో ఈ వినూత్న నిర్ణయం తీసుకున్నారు. గంగాధర నెల్లూరు నియోజకవర్గంలోని శ్రీరంగారాజపురం మండలం పుల్లూరు సర్పంచ్ భావ్య శ్రీ. గ్రామంలో నాటు సారాకు బ్రేకులు వేయాలని నిర్ణయించారు. స్థానికంగా ఎవరూ సారాకు బలి కాకూడదని భావించారు. గ్రామాన్ని సారా రహిత ప్రాతంగా తీర్చిదిద్దే ప్రయతం చేస్తున్నారు.. వినూత్న ప్రయోగానికి శ్రీకారం చుట్టారు. నాటు సారా తయారు చేస్తున్న వారు, విక్రయించే వారి పేర్లను చెప్పినా, చూపించినా బహుమతి ప్రకటించారు. వివరాలు చెబితే వారికి రూ.10వేలు.. ఆ సారాను విక్రయించే వారిని చూపించిన వారికి రూ.5 వేలు బహుమానాన్ని ప్రకటించారు. ఊరిలో సర్పంచ్ దండోరా వేయించారు. ఇక నాటుసారా తయారు చేసేవారికి, విక్రయించే వారి రేషన్, ఇతర ప్రభుత్వ పథకాలు రాకుండా చేస్తామని హెచ్చరించారు. సర్పంచ్ నిర్ణయంపై స్థానికులు హర్షం వ్యక్తం చేస్తున్నారు. సారాను నియంత్రించేందుకు ఆమె తీసుకున్న నిర్ణయం అద్భుతమంటూ ప్రశంసలు కురిపిస్తున్నారు.
0 Comments