తెలంగాణలో కరోనా వ్యాక్సినేషన్ ప్రక్రియ కొనసాగుతోంది. చాలామంది కరోనా టీకా వేసుకునేందుకు ఆసక్తి చూపుతూ ముందుకు వస్తున్నారు. దీంతో ప్రతీ చోట వ్యాక్సినేషన్ సెంటర్లను ఏర్పాటు చేసి టీకా అందిస్తున్నారు అధికారులు. అయితే ఈ క్రమంలో కొందరు వైద్య సిబ్బంది టీకా విషయంలో నిర్లక్ష్యం వహిస్తున్నారు. తాజాగా కరోనా వ్యాక్సిన్ కోసం వెళ్లిన ఓ మహిళకు అక్కడ సిబ్బంది కుక్క కాటు వ్యాక్సిన్ ఇచ్చారు. ఈ ఘటన నల్గొండ జిల్లాలో జరిగింది. వివరాల్లోకి వెళ్తే.. కట్టంగూరు మండలం బొల్లెపల్లి ప్రభుత్వ ప్రాథమిక పాఠశాలలో పుట్ట ప్రమీల పారిశుద్ధ్య కార్మికురాలిగా పనిచేస్తున్నారు. కొవిడ్‌ వ్యాక్సిన్ కోసం పాఠశాల ప్రధానోపాధ్యాయుడు ఇచ్చిన లేఖ తీసుకుని ఆమె మంగళవారం ఉదయం 11 గంటలకు కట్టంగూరు పీహెచ్‌సీకి వెళ్లారు. పీహెచ్‌సీ భవనంలో సాధారణ టీకాలు ఇస్తుండగా.. పక్కనే ఉన్న ఆయుష్‌ భవనంలో కొవిడ్‌ టీకాలు వేస్తున్నారు. ఈ విషయం తెలియని ప్రమీల నేరుగా పీహెచ్‌సీకి వెళ్లారు. అదే సమయంలో వచ్చిన ఓ మహిళకు నర్సు యాంటి రేబిస్‌ వ్యాక్సిన్‌ను వేసింది. కొవిడ్‌ టీకా ఇవ్వాలంటూ ప్రధానోపాధ్యాయుడు ఇచ్చిన లేఖను చదవకుండానే తనకూ అదే సిరంజీతో యాంటి రేబిస్‌ వ్యాక్సిన్ ఇచ్చిందని ఆమె ఆరోపించారు. ఒకే సిరంజీతో ఇద్దరికి ఎలా ఇస్తారని ప్రశ్నించడంతో నర్సు అక్కడి నుంచి వెళ్లిపోయిందని తెలిపారు. ఈ విషయంపై మండల వైద్యాధికారి కల్పనను వివరణ కోరగా 'బాధితురాలు కరోనా టీకా బ్లాక్‌లోకి కాకుండా, యాంటిరేబిస్‌ వ్యాక్సిన్ ఇస్తున్న గదిలోకి వెళ్లారు. ఆమెకు కుక్క కరిచిందని నర్సు పొరపాటు పడింది. ఆమెకు రేబిస్‌ వ్యాక్సిన్ వేయలేదు. టీటీ ఇంజక్షన్‌ ఇచ్చాం. దాంతో ఎలాంటి ప్రమాదం ఉండదు' అని తెలిపారు. అయినా కూడా వైద్య సిబ్బంది నిర్లక్ష్యంపై స్థానికులు ఆగ్రహం వ్యక్తం చేస్తున్నారు. అంత నిర్లక్ష్యంగా ఇంజక్షన్లు ఎలా చేస్తారంటూ ప్రశ్నిస్తున్నారు.
0 Comments