కెప్టెన్ విరాట్ కోహ్లీపై టీమిండియా అతిగా ఆధారపడటం లేదని ఆల్ రౌండర్ అక్షర్ పటేల్ స్పష్టం చేశాడు. జూన్ 2న ఇంగ్లాండ్ పర్యటనకి వెళ్లనున్న భారత జట్టు అక్కడ సౌథాంప్టన్ వేదికగా జూన్ 18 నుంచి ఐసీసీ వరల్డ్ టెస్టు ఛాంపియన్‌షిప్ ఫైనల్లో న్యూజిలాండ్‌తో తలపడనుంది. అనంతరం ఇంగ్లాండ్‌తో ఐదు టెస్టుల సిరీస్‌లో భారత్ ఢీకొట్టనుంది. ఈ మేరకు 20 మందితో కూడిన జట్టుని భారత సెలెక్టర్లు ప్రకటించగా ఇందులో ఆల్ రౌండర్లుగా రవీంద్ర జడేజా, అక్షర్ పటేల్, వాషింగ్టన్ సుందర్ ఎంపికయ్యారు ఇంగ్లాండ్ టూర్ ముంగిట పటేల్ మాట్లాడుతుండగా టీమిండియా అతిగా కోహ్లీపై ఆధారపడుతోందనే వాదన తెరపైకి వచ్చింది. దాంతో అక్షర్ పటేల్ స్పందించాడు. ‘‘గతంలోనూ ఇలానే ఒకరిపైనే టీమిండియా అతిగా ఆధారపడుతోందని వాదనలు వినిపించాయి. కానీ ఇప్పుడు భారత జట్టులో రోహిత్ శర్మ, విరాట్ కోహ్లీ, అజింక్య రహనే, రిషబ్ పంత్ లాంటి బ్యాట్స్‌మెన్‌లు ఉన్నారు. కాబట్టి ఒకరిపైనే అతిగా ఆధారపడుతోంది అనే వాదన కరెక్ట్ కాదు. 2020-21 ఆస్ట్రేలియా పర్యటన నుంచి ఆరంభంలోనే స్వదేశానికి వచ్చేశాడు. అయినప్పటికీ.. భారత జట్టు సిరీస్ గెలిచింది. ఆ తర్వాత ఇంగ్లాండ్‌తో సిరీస్‌లోనూ కోహ్లీ ఆరంభంలోనే ఔట్ అయినా మిగిలిన బ్యాట్స్‌మెన్‌లు రిషబ్ పంత్, వాషింగ్టన్ సుందర్, లోయర్ ఆర్డర్ బ్యాట్స్‌మెన్‌లు కూడా రాణించారు. కాబట్టి టీమిండియా సిరీస్ గెలవగలిగింది’’అని అక్షర్ పటేల్ స్పష్టం చేశాడు. ఈ ఏడాది ఆరంభంలో ముగిసిన ఆస్ట్రేలియా పర్యటనలో విరాట్ కోహ్లీ ఫస్ట్‌లోనే స్వదేశానికి వచ్చేయగా అనంతరం మూడు టెస్టులు ఆడిన టీమిండియా సిరీస్‌ని 2-1 తో చేజిక్కించుకుంది. ఆ తర్వాత ఇంగ్లాండ్‌తో సిరీస్‌లోనూ కోహ్లీ చెప్పుకోదగ్గ స్కోర్లు చేయలేకపోయాడు. అయినప్పటికీ భారత జట్టు 3-1 తో సిరీస్ గెలిచింది ఇంకా ఆసక్తికరమైన విషయం ఏంటంటే విరాట్ కోహ్లీ గత ఏడాదన్నరగా కనీసం ఒక్క సెంచరీ కూడా నమోదు చేయలేదు.
0 Comments