టీమిండియా యువ వికెట్ కీపర్ రోజురోజుకీ మెరుగవుతున్నాడు. గత ఏడాదితో పోలిస్తే ఆట పరంగానే కాకుండా ఫిట్‌నెస్ విషయంలోనూ రిషబ్ పంత్ ఎవరూ ఊహించనిరీతిలో తన తప్పిదాల్ని దిద్దుకున్నాడు. దాంతో.. ఇప్పటికే భారత్ జట్టులో ఫస్ట్ ఛాయిస్ వికెట్ కీపర్‌గా కితాబులు అందుకుంటున్న రిషబ్ పంత్.. జూన్ 2న టీమిండియాతో కలిసి ఇంగ్లాండ్ పర్యటనకి వెళ్లబోతున్నాడు. అక్కడ జూన్ 18 నుంచి న్యూజిలాండ్‌తో ఐసీసీ వరల్డ్ టెస్టు ఛాంపియన్‌షిప్ ఫైనల్లో తలపడనున్న టీమిండియా.. ఆ తర్వాత ఇంగ్లాండ్‌తో ఐదు టెస్టుల సిరీస్‌లో ఢీకొట్టబోతోంది. ఇంగ్లాండ్ టూర్‌కి ఎంపికైన రిషబ్ పంత్.. ప్రస్తుతం ముంబయిలోని హోటల్‌లో టీమిండియాతో కలిసి క్వారంటైన్‌లో ఉన్నాడు. ఈ క్రమంలో జిమ్‌లో కసరత్తులు చేస్తున్న పంత్.. టీమిండియా అనలిస్ట్‌ హరిప్రసాద్‌ మోహన్‌ని పహిల్వాన్ తరహాలో గిరగిరా తిప్పేసి కిందపడేశాడు. అధిక బరువుతో గత ఏడాది తీవ్ర విమర్శలు ఎదుర్కొన్న పంత్.. ఈ తరహాలో ఫిట్‌నెస్‌ని మెరుగు పర్చుకోవడంపై నెటిజన్లు ఆశ్చర్యం వ్యక్తం చేస్తున్నారు. 2018లో ఇంగ్లాండ్ పర్యటనకి వెళ్లిన భారత జట్టులో ఉన్న పంత్.. 162 పరుగులు చేశాడు. ఇందులో ఒక శతకం కూడా ఉంది. కానీ.. ఆ తర్వాత అతని కెరీర్ గాడి తప్పింది. అయితే.. గత ఆరు నెలలుగా మళ్లీ కెరీర్ బెస్ట్ ఫామ్‌ని పంత్ కనబరుస్తున్నాడు. ఆస్ట్రేలియాతో మూడు టెస్టులాడిన పంత్ 274 పరుగులు చేశాడు. ఇందులో కీలకమైన గబ్బా టెస్టులో అతను కొట్టిన 89 పరుగుల ఇన్నింగ్స్‌ అత్యుత్తమైనది. ఆ తర్వాత ఇంగ్లాండ్‌తో జరిగిన నాలుగు టెస్టుల సిరీస్‌లోనూ 270 పరుగులు చేశాడు.
0 Comments