ఐపీఎల్‌లో లేని ముంబయి ఇండియన్స్ జట్టుని ఇప్పుడు ఊహించగలరా..? 2013లో ముంబయి ఇండియన్స్ కెప్టెన్‌గా బాధ్యతలు చేపట్టిన రోహిత్ శర్మ వరుసగా 2013, 2015, 2017, 2019, 2020 సీజన్లలో ఆ జట్టుని టైటిల్ విజేతగా నిలిపాడు. 14 ఏళ్ల ఐపీఎల్ చరిత్రలో అత్యధిక టైటిళ్లు గెలిచిన కెప్టెన్‌గా కొనసాగుతున్న రోహిత్ శర్మ‌ని 2011లోనే ఒడిసిపట్టుకునే ఛాన్స్ చెన్నై సూపర్ కింగ్స్‌కి లభించింది. కానీ.. 2011 ఐపీఎల్ సీజన్ వేలానికి రెండు రోజుల ముందే తాము రోహిత్ శర్మ కోసం బిడ్ వేయబోమని చెన్నై సూపర్ కింగ్స్ ఫ్రాంఛైజీ ప్రకటించేసింది. దానికి కారణం ఏంటనేది ఇప్పటికీ మిస్టరీనే. దక్కన్ ఛార్జర్స్‌ తరఫున అప్పటికే సత్తాచాటిన రోహిత్ శర్మ కోసం 2011 ఐపీఎల్ సీజన్ ఆటగాళ్ల వేలంలో పంజాబ్ కింగ్స్ గట్టిగానే ప్రయత్నించింది. ముంబయి ఇండియన్స్‌కి పోటీగా వేలంలో పంజాబ్‌తో పాటు మళ్లీ దక్కన్ ఛార్జర్‌ రూ. కోట్లు కుమ్మరించేందుకు సిద్ధమయ్యాయి. కానీ.. చివరి వరకూ పట్టువదలని ముంబయి ఇండియన్స్ ఏకంగా రూ.9.2 కోట్లకి హిట్‌మ్యాన్‌ని కొనుగోలు చేసింది. అప్పటికి ముంబయి ఒక్క టైటిల్ కూడా గెలవలేదు. కానీ.. చెన్నై సూపర్ కింగ్స్ మాత్రం అప్పటికే ఒక టైటిల్ (2010)లో గెలిచింది. 2011లోనూ చెన్నై టీమ్ టోర్నీ విజేతగా నిలిచిన విషయం తెలిసిందే. ఐపీఎల్ 2011 సీజన్ వేలానికి రెండు రోజుల ముందు రోహిత్ శర్మ‌ని కొనుగోలు చేయాలని చెన్నై సూపర్ కింగ్స్‌కి ఓ అభిమాని ట్విట్టర్‌లో రిక్వెస్ట్ చేశాడు. కానీ.. రోహిత్ శర్మ కోసం బిడ్ వేయబోమని చెన్నై రిప్లై ఇచ్చింది. ఆ సమయంలో మహేంద్రసింగ్ ధోనీ కెప్టెన్సీలోనే రోహిత్ శర్మ దక్షిణాఫ్రికా గడ్డపై మ్యాచ్‌లు ఆడుతూ ఉండటం గమనార్హం.
0 Comments