రాయలసీమ మీదుగా ద్రోణి.. ఉత్తర కోస్తాలో నేడు, రేపు భారీ వర్షాలు

ఉత్తర కోస్తాలో ఆది, సోమవారాల్లో అక్కడక్కడా భారీ వర్షాలు కురవనున్నాయని వెల్లడించింది. చాలా చోట్ల ఉరుములు, మెరుపులతో తేలికపాటి నుంచి ఒక మోస్తరు వానలు కురిసే అవకాశం ఉందని తెలిపింది. దక్షిణ కోస్తా, రాయలసీమలోనూ రెండు రోజులపాటు తేలికపాటి నుంచి ఒక మోస్తరు వానలు పడనున్నాయని అమరావతి వాతావరణ కేంద్రం డైరెక్టర్‌ స్టెల్లా తెలిపారు. విదర్భ, తెలంగాణ, రాయలసీమ మీదుగా దక్షిణ తమిళనాడు వరకు ద్రోణి ఏర్పడిందని, దీని ప్రభావంతో వర్షాలు కురుస్తాయని పేర్కొన్నారు. ద్రోణి సముద్ర మట్టానికి 0.9 కిలోమీటర్ల ఎత్తున ఉందని వివరించారు. నైరుతి రుతుపవనాలు ముందుగా అనుకున్నట్టు కేరళకు చేరుకుంటాయని తెలిపారు. మే 31న కేరళ తీరంలోకి ప్రవేశించేందుకు అనుకూల పరిస్థితులు ఉన్నాయని ఆమె పేర్కొన్నారు. కాగా, మూడు రోజులుగా పగటి ఉష్ణోగ్రతలు తగ్గుతుండగా రాత్రి ఉష్ణోగ్రతలు పెరుగుతున్నాయి. దీంతో రాత్రి సమయంలో వేడిగాలులకు వీస్తున్నాయి. సాధారణం కంటే అధికంగా ఉష్ణోగ్రతలు నమోదవుతున్నాయి. బంగాళాఖాతంలో ఏర్పడిన యాస్ తుఫాన్ ప్రభావంతో రెండు రోజులు వాతావరణం కాస్త చల్లబడినా... ఆ తర్వాత ఎండలు మండుతున్నాయి. రాష్ట్ర వ్యాప్తంగా అధిక ఉష్ణోగ్రతలు నమోదయ్యే అవకాశమున్నట్లు రాష్ట్ర విపత్తు నిర్వహణ శాఖ ప్రకటించింది. శ్రీకాకుళం, విజయనగరం, తూర్పుగోదావరి, పశ్చిమగోదావరి, కృష్ణా, గుంటూరు జిల్లాల్లోని కొన్ని ప్రాంతాల్లో 44-45 డిగ్రీలు, విశాఖపట్నం, , ప్రకాశం, నెల్లూరు జిల్లాల్లో కొన్ని ప్రాంతాల్లో 42-43 డిగ్రీలు, చిత్తూరు, కడప, అనంతపురం, కర్నూలు జిల్లాల్లో కొన్ని ప్రాంతాల్లో 39-41 డిగ్రీలల వరకు ఉష్ణోగ్రతలు నమోదయ్యే అవకాశముందని ఐఎండీ హెచ్చరించింది.