ఆంధ్రప్రదేశ్ డీజీపీ గౌతమ్‌ సవాంగ్‌ను సైబర్ నేరగాళ్లు టార్గెట్ చేశారు. ‘డీజీపీ ఆంధ్రప్రదేశ్’ పేరిట గుర్తుతెలియని వ్యక్తులు ఆదివారం ట్విటర్‌లో ఫేక్ అకౌంట్‌ను ప్రారంభించారు. దానికి డీజీపీ గౌతమ్‌ సవాంగ్‌ చిత్రాన్ని ప్రొఫైల్ పిక్‌గా పెట్టారు. ఆంధ్రప్రదేశ్ డీజీపీ అధికారిక ఖాతా ఇదేనని ట్విటర్ హ్యాండిల్‌లో పేర్కొన్నారు. ఆ తర్వాత వరుసగా పలు ట్వీట్లు చేశారు. నకిలీ ఖాతా అనే విషయం గుర్తించకుండా పలు జిల్లాల ఎస్పీలు, ఇతరులు ఈ ట్విటర్ ఖాతాను అనుసరించారు. అయితే ట్వీట్లు అనుమానాస్పదంగా ఉండటంతో అది నకిలీ ఖాతాగా గుర్తించగలిగారు. విషయం తెలిసిన వెంటనే ఆంధ్రప్రదేశ్ పోలీసు ప్రధాన కార్యాలయం ట్విటర్‌కు ఫిర్యాదు చేసి ఈ ఖాతాను బ్లాక్ చేయించింది. ఈ అంశంపై విజయవాడలోని సైబర్ నేరాల పోలీసుస్టేషన్‌లో ఫిర్యాదు చేసింది. ఈ ఫేక్ అకౌంట్‌ను ఏ ఐపీ అడ్రస్‌నుంచి క్రియేట్ చేశారు, దీని వెనుక ఎవరున్నారు? ఆకతాయిల పనా? లేక దురుద్దేశాలేవైనా ఉన్నాయా? అన్న కోణాల్లో సైబర్ క్రైమ్ పోలీసులు విచారణ చేపట్టారు.
0 Comments