జిల్లాలో విషాద ఘటన చోటుచేసుకుంది. కంకర రాళ్ల క్వారీ జరిపిన పేలుడులో పక్కనున్న మామిడి తోటలో పనికి వచ్చిన కూలీ దుర్మరణం చెందాడు. చౌడేపల్లి మండలం కడియాల కుంట సమీపంలోని అంకాలయ్మ కొండ వద్ద ఈ దుర్ఘటన జరిగింది. చౌడేపల్లి ఎస్సై తెలిపిన వివరాల మేరకు.. పెద్దకొండామరి పంచాయతీ కోటూరుకు చెందిన కొందరు కూలీలు అంకాలమ్మ కొండ సమీపంలోని ఓ మామిడి తోటలో కాయలు కోసేందుకు వచ్చారు. కాయలు కోస్తుండగా పక్కనే ఉన్న క్వారీ సూపర్‌వైజర్ పేలుడు జరగనుందని.. దూరంగా వెళ్లాలని సమాచారమిచ్చాడు. పేలుడు జరుగుతుందని చెప్పడంతో కూలీలు ట్రాక్టర్‌లో సుమారు 500 మీటర్ల దూరంగా వెళ్లి తిరుపతి వెళ్లే మెయిన్‌రోడ్డుపై ఆగారు. ట్రాక్టర్ నిలిపివేసి అక్కడే వేచిచూశారు. ఇంతలో క్వారీలో పేలుడు ధాటికి పెద్ద బండరాయి ఎగిరొచ్చి ట్రాక్టర్‌లో కూర్చుని ఉన్న కూలీ జాకీర్(35) పడింది. తీవ్రగాయాలు కావడంతో జాకీర్ అక్కడికక్కడే ప్రాణాలు కోల్పోయాడు. కూలీ కోసం వచ్చి ప్రాణాలు కోల్పోవడంతో జాకీర్ కుటుంబ సభ్యులు కన్నీటిపర్యంతమయ్యారు. అయితే ఆ క్వారీ మంత్రి పెద్దిరెడ్డి రామచంద్రారెడ్డికి చెందినదేనని.. పీఎల్‌ఆర్ కన్‌స్ట్రక్షన్ కంపెనీ కింద క్వారీ నిర్వహిస్తున్నారన్న ఆరోపణలున్నాయి. క్వారీ విజయవాడకు చెందిన ఆదినారాయణ లీజుకు తీసుకుని నిర్వహిస్తున్నారని చెబుతున్నారు. మంత్రి క్వారీలో పేలుడు కారణంగా కూలీ చనిపోయాడని.. అతనికి కోటి రూపాయల నష్ట పరిహారం ఇవ్వాలని పుంగనూరు టీడీపీ ఇన్‌చార్జి శ్రీనాథరెడ్డి డిమాండ్ చేశారు. Also Read:
0 Comments