బతికుండగానే తల్లికి పెద్దకర్మ.. పెద్దకొడుకు నిర్వాకం, కార్డులు పంచి మరీ

కుటుంబ కలహాలతో బ్రతికున్న కన్నతల్లికే పెద్దకర్మ చేయాలని నిర్ణయించాడో కిరాతక కొడుకు. బంధువులకు సమాచారం ఇవ్వడంతో పాటు గ్రామంలో పెద్దకర్మ కార్డులు కూడా పంపిణీ చేశాడు. ఈ విషయం తెలుసుకున్న తల్లి పోలీసులను ఆశ్రయించడంతో ఈ ఘటన వెలుగులోకి వచ్చింది. జిల్లా నకిరేకల్‌కు చెందిన వారణాసి పోషమ్మకు ఇద్దరు కుమారులు. నలుగురు కుమార్తెలు. అందరికీ వివాహాలయ్యాయి. చాలాకాలంగా పోషమ్మ చిన్న కుమారుడి వద్దనే ఉంటోంది. ఈ నేపథ్యంలో ‘ఈ నెల 19న తన తల్లి పోశమ్మ మృతి చెందారని, 28న పెద్దకర్మ నిర్వహిస్తున్నాం’ అని పేర్కొంటూ పెద్ద కుమారుడు కార్డులను ముద్రించి బంధువులకు పంపిణీ చేశాడు. చాలామంగి బంధువులు చిన్న కుమారుడికి ఫోన్ చేసి సంగతి ఆరా తీయగా పెద్ద కుమారుడి నిర్వాకం బయటపడింది. దీంతో పెద్దకొడుకుపై పోషమ్మ పోలీసులకు ఫిర్యాదు చేశారు. ఆమె ఫిర్యాదును పరిశీలిస్తున్నామని, త్వరలోనే చర్యలు తీసుకుంటామని సీఐ నాగరాజు తెలిపారు.