టీమిండియాలో ఒక్క ఛాన్స్ కోసం పడిగాపులు.. నిద్రలేని రాత్రులు గడిపా: జడేజా

రవీంద్ర జడేజా.. టీమిండియాలో ఇప్పుడు మూడు ఫార్మాట్లలోనూ తిరుగులేని ఆల్‌రౌండర్. ప్రత్యర్థి ఎవరైనా.. పిచ్ ఎలాంటిదైనా.. ఏ పొజీషన్‌లోనైనా జడేజా బ్యాటింగ్ చేయగలడు. అలానే చకచకా బౌలింగ్ చేస్తూ నిమిషాల్లోనే ఓవర్‌ని పూర్తి చేసే జడ్డూ.. ఫీల్డింగ్‌లోనూ అత్యుత్తమంగా రాణిస్తున్నాడు. మరీ ముఖ్యంగా.. మెరుపు వేగంతో డైరెక్ట్ హిట్ రనౌట్లు జడేజా స్పెషల్. దాంతో.. రవీంద్ర జడేజాని రిజర్వ్ బెంచ్‌పై కూర్చోబెట్టడమంటే అది టీమిండియా మేనేజ్‌మెంట్ సాహసమే అని చెప్పాలి. కానీ.. మూడేళ్ల క్రితం పరిస్థితి పూర్తి భిన్నం. అప్పట్లో జడేజాకి దాదాపు ఏడాదన్నర పాటు కనీసం తుది జట్టులో కూడా అవకాశం దక్కలేదట. దాంతో.. తాను అనుభవించిన మానసిక క్షోభని తాజాగా ఓ ఇంటర్వ్యూలో ఎమోషనల్‌గా చెప్పుకొచ్చాడు. ‘‘నిజాయతీగా చెప్పాలంటే.. ఆ ఏడాదన్నరపాటు నిద్రలేని రాత్రులు గడిపా. తెల్లవారు జామున 4-5 వరకూ నిద్రపోకుండా ఆలోచిస్తూ ఉండేవాడ్ని. తుది జట్టులోకి రావాలంటే మళ్లీ ఏం చేయాలి..? ఎలా చేయాలి..? అని అప్పట్లో తీవ్రంగా సతమతమయ్యేవాడ్ని. అప్పట్లో టెస్టు జట్టులోకి నన్ను రెగ్యులర్‌గా ఎంపిక చేసేవారు. కానీ.. విదేశాల్లో ఎక్కువ మ్యాచ్‌లు ఆడటంతో తుది జట్టులో అవకాశం దక్కేదికాదు. అలానే వన్డేల్లోనూ ఛాన్స్ ఇవ్వలేదు. మరోవైపు టీమిండియాతో కలిసి ప్రయాణిస్తూ దేశవాళీ క్రికెట్‌లోనూ మ్యాచ్‌లు ఆడలేకపోయాను. మొత్తంగా నన్ను నేను నిరూపించుకునేందుకు కొన్ని నెలల పాటు ఒక్క ఛాన్స్ కూడా లేకపోయింది. కానీ.. ఒక్క టెస్టు మ్యాచ్ నా కెరీర్‌ని మార్చేసింది. ఇంగ్లాండ్ లాంటి బెస్ట్ బౌలింగ్‌ని ఎదుర్కొని 86 పరుగులు చేయడంతో.. నాలో ఆత్మవిశ్వాసం అమాంతం పెరిగింది. ఆ ఇన్నింగ్స్ తర్వాత ప్రపంచంలో ఎక్కడైనా పరుగులు చేయగలను అనిపించింది’’ అని రవీంద్ర జడేజా చెప్పుకొచ్చాడు. 2018లో ఇంగ్లాండ్ పర్యటనకి వెళ్లిన టీమిండియా.. ఓవెల్‌లో జరిగిన టెస్టు మ్యాచ్ మొదటి ఇన్నింగ్స్‌లో ఒకానొక దశలో 160/6తో పీకల్లోతు కష్టాల్లో నిలిచింది. ఈ దశలో బాధ్యతాయుత ఇన్నింగ్స్ ఆడిన రవీంద్ర జడేజా 156 బంతుల్లో 86 పరుగులతో అజేయంగా నిలిచాడు. ఆ తర్వాత ఆల్‌రౌండర్ హార్దిక్ పాండ్యా గాయపడటంతో వన్డేల్లోనూ జడేజాకి అవకాశం దక్కింది. మొత్తంగా 2019 వన్డే ప్రపంచకప్ తర్వాత జడేజా కెరీర్‌ అత్యుత్తమ దశలో కొనసాగుతోంది. జూన్ 2న ఇంగ్లాండ్‌ గడ్డపైకి వెళ్లనున్న కోహ్లీ కెప్టెన్సీలోని భారత టెస్టు జట్టు.. అక్కడ సౌథాంప్టన్ వేదికగా న్యూజిలాండ్‌తో జూన్ 18 నుంచి 23 వరకూ ఐసీసీ వరల్డ్ టెస్టు ఛాంపియన్‌షిప్ ఫైనల్‌‌లో తలపడి.. ఆ తర్వాత ఆగస్టు 4 నుంచి సెప్టెంబరు 10 వరకూ ఇంగ్లాండ్‌తో ఐదు టెస్టుల సిరీస్‌‌లో ఢీకొట్టబోతోంది. ఈ జట్టులోకి ఆల్‌రౌండర్‌గా జడేజా ఎంపికయ్యాడు.