అలిపిరి మెట్ల మార్గంలో అస్థిపంజరం... వెలుగులోకి షాకింగ్ విషయాలు

అలిపిరి నడక మార్గానికి సమీపంలోని శేషాచలం అటవీ ప్రాంతంలో ఓ యువకుడు చెట్టుకు ఉరివేసుకుని ఆత్మహత్య చేసుకున్న సంఘటన ఆలస్యంగా వెలుగుచూసింది. చిత్తూరు జిల్లా సీఎస్‌పురం మండలం నల్లమడగలకు చెందిన సి.మహేష్‌బాబు(35) మహారాష్ట్రలోని పుణెలో ఉన్న ఆర్మీ క్యాంటీన్‌లో సూపర్‌వైజర్‌గా పనిచేస్తున్నారు. 2020 ఫిబ్రవరి నుంచి కనిపించకుండా పోయారు. దీనిపై అక్కడి పోలీస్‌స్టేషన్‌లో మిస్సింగ్‌ కేసు నమోదైంది. అలిపిరి- తిరుమల నడక మార్గంలోని లక్ష్మీనరసింహస్వామి ఆలయానికి సమీపంలోని అటవీ ప్రాంతంలో కొద్దిరోజుల క్రితం చెట్టుకు ఉరేసుకుని ఆత్మహత్య చేసుకున్నాడు. అటవీ ప్రాంతం కావడంతో ఎవరూ గుర్తించలేదు. మృతదేహం ఎముకలు బయటపడి ఉండటంతో శుక్రవారం గమనించిన కొందరు టీటీడీ భద్రతా సిబ్బందికి సమాచారమిచ్చారు. వారు తిరుమల పోలీసులకు చెప్పడంతో సంఘటనా స్థలానికి చేరుకుని మృతదేహం పరిశీలించగా ఆధార్‌ కార్డు, డ్రైవింగ్‌ లైసెన్సు, పాన్‌కార్డు లభించాయి. వీటి ఆధారంగా పోలీసులు దర్యాప్తు చేయడంతో మృతుడి వివరాలు లభించాయి. దీంతో తిరుమల పోలీసులు కుటుంబసభ్యులకు సమాచారం అందించారు. అయితే మహేష్‌బాబు ఆత్మహత్యకు కారణాలు తెలియరాలేదు. కేసు నమోదు చేసి మృతదేహాన్ని శవపరీక్షల నిమిత్తం తిరుపతి ప్రభుత్వ రుయా ఆసుపత్రికి తరలించారు.