కొంప ముంచిన మందు పంపిణీ.. కృష్ణపట్నంలో కరోనా కేసులు, స్థానికుల్లో టెన్షన్ ,

కరోనా నివారణకు ఆయుర్వేద మందు తయారీతో దేశాన్ని ఆకర్షించిన జిల్లా గ్రామంలో తాజాగా కరోనా పాజిటివ్‌ కేసులు కలకలం రేపుతున్నాయి. శనివారం కృష్ణపట్నం గ్రామ సచివాలయంలో వైద్య, ఆరోగ్య శాఖ ఆధ్వర్యంలో రాపిడ్ టెస్టులు నిర్వహించగా ఒకే ఫ్యామిలీలో ముగ్గురికి కరోనా పాజిటివ్ అని తేలింది. దీంతో కృష్ణపట్నం ప్రజలు ఆందోళనకు గురవుతున్నారు. కృష్ణపట్నంలో ఒక్క కరోనా కేసు కూడా నమోదు కాలేదని మొన్నటివరకు అందరూ చెప్పుకొచ్చారు. ఆనందయ్య ఆయుర్వేద మందు తీసుకున్న వారందరూ మాస్కులు ధరించకుండా నిర్భయంగా తిరిగేవారు. ఈ మందుపై సోషల్‌మీడియాలో విపరీతంగా ప్రచారం జరగడంతో తెలుగు రాష్ట్రాలతో పాటు తమిళనాడు, కర్ణాటక నుంచి కూడా భారీగా ప్రజలు తరలివచ్చారు. వేల సంఖ్యలో వచ్చిన వారిని పోలీసులు, గ్రామస్తులు అదుపు చేయలేకపోయారు. తదనంతర పరిణామాలతో ఏపీ ప్రభుత్వం ఆనందయ్య మందు పంపిణీని తాత్కాలికంగా నిలిపివేసింది. అయితే ఆ మందు పంపిణీ తిరిగి మళ్లీ ఎప్పుడు ప్రారంభమవుతుందోనని అందరూ ఎదురు చూస్తున్న సమయంలో కృష్ణపట్నంలో కరోనా కేసులు కలవరపరుస్తున్నాయి. తాజాగా కరోనా బారిన పడిన కుటుంబసభ్యులు ఆనందయ్య మందు తీసుకున్నట్లు తెలుస్తోంది. ఈ కుటుంబం ఆనందయ్య మందు పంపిణీ ప్రక్రియలో పాల్గొనడం గమనార్హం. దీంతో ఆ ప్రక్రియలో పాల్గొన్న వారందరికీ కరోనా టెస్టులు నిర్వహించాలని అధికారులను స్థానికులు కోరుతున్నారు. ఇన్నాళ్లూ కరోనా కేసులు నమోదు కాలేదని గర్వంగా ఫీలయ్యే కృష్ణపట్నం ప్రజలు తాజా కేసులతో తీవ్ర భయాందోళనకు గురవుతున్నారు. మందు కోసం ఇతర ప్రాంతాల నుంచి వచ్చిన వారి ద్వారానే కరోనా సోకి ఉంటుందని అనుమానిస్తున్నారు.