ద్వాపరంలో ధృతరాష్ట్రుడే కలియుగంలో బాబులా.. మంత్రి సంచలన వ్యాఖ్యలు

ప్రభుత్వం సంక్షేమం పేరుతో అంకెల గారడీ చేస్తోందని.. నవరత్నాల పేరుతో నకిలీ రత్నాలని అమలు చేస్తోందని మాజీ సీఎం, టీడీపీ అధినేత చేసిన వ్యాఖ్యలకు అధికార పార్టీ కౌంటర్ ఇచ్చింది. ప్రభుత్వం రెండేళ్లలో రూ.1.31 లక్షల కోట్లు ఖర్చు చేస్తే.. 8.89 కోట్ల మంది లబ్ది పొందారని ఇది చంద్రబాబుకు కనిపించలేదా? అని మండిపడ్డారు. ద్వాపరయుగంలో ఉన్న ధృతరాష్ట్రుడే కలియుగంలో చంద్రబాబులా మళ్లీ పుట్టారని శనివారం ఆయన ఓ ప్రకటనలో వ్యంగ్యాస్త్రాలు సంధించారు. ‘ఆ ధృతరాష్ట్రుడు కళ్లులేక చూడలేకపోయారు. అభినవ ధృతరాష్ట్రుడు కళ్లు ఉండి కూడా జగనన్న సంక్షేమ పాలనను చూడలేకపోతున్నారు’ అని మండిపడ్డారు. ‘నవరత్నాలతో ఇప్పటి వరకు రూ.1.31 లక్షల కోట్లు ఖర్చు చేశాం.. 8.89 కోట్ల మంది లబ్ధి పొందారు. విద్యార్థులు, రైతులు, వృద్ధులు, ఎస్సీ, ఎస్టీ బీసీ, మైనారిటీల సంక్షేమం, సమగ్ర పురోగతే ధ్యేయంగా జగన్‌ ముందుకెళ్తున్నారు. కరోనాతో రాష్ట్ర ఆదాయం తగ్గిపోయినా పేదలకు సంక్షేమ పథకాలు ఆపలేదు. ప్రభుత్వ పథకాలను గుడ్డిగా నకిలీ రత్నాలుగా అభివర్ణించిన చంద్రబాబు ఇకనైనా కళ్లు తెరిచి బేషరతుగా క్షమాపణలు చెప్పాలి’ అని డిమాండ్‌ చేశారు. నవ్యాంధ్రప్రదేశ్ రెండో ముఖ్యమంత్రిగా వైఎస్ జగన్మోహన్‌రెడ్డి బాధ్యతలు చేపట్టిన నేటితో రెండేళ్లు పూర్తయ్యింది. శాసనసభ ఎన్నికల్లో ఘన విజయం సాధించిన జగన్ అధికారం చేపట్టారు. ఈ రెండేళ్లలో నవరత్నాల పేరుతో సంక్షేమ పథకాలను అమలు చేశారు. ఈ పథకాలపై ప్రతిపక్షాలు విమర్శలు గుప్పిస్తున్నాయి. గోరంత చేసి, కొండంత దోచుకుంటూ ప్రజల్ని మోసగిస్తోందని చంద్రబాబు ధ్వజమెత్తారు. ప్రభుత్వం చెప్పేవన్నీ అవాస్తవాలేనని, చేసేవన్నీ మోసాలని ప్రతి స్కీమ్‌నీ.. స్కామ్‌గా మార్చేసిన ఘనత జగన్‌కే దక్కుతుందని ఆరోపించారు. రైతులకు రూ.13,500 ఇస్తామని, కేంద్రం ఇచ్చేదీ వీళ్ల లెక్కల్లో చూపిస్తున్నారని, ఆటోడ్రైవర్లకు రూ.10 వేలు ఇచ్చి, రూ.30 వేలు దోచుకుంటున్నారని మండిపడ్డారు. పింఛన్లు, పీడీఎస్‌ రాయితీల్ని కూడా.. వ్యవసాయం కోసం చేస్తున్న ఖర్చులో చూపిస్తున్నారు. అంకెలు తారుమారు చేసి, ప్రతివారం ప్రకటనలతో మభ్యపెడుతున్నారని విమర్శించారు.