లంచం తీసుకుంటూ.. అడ్డంగా దొరికిన జీహెచ్ఎంసీ మహిళా ఉద్యోగి

కరోనా సమయంలో కూడా లంచగొండి అధికారులు తమ తీరు మార్చుకోలేదు. డబ్బుల కోసం అమాయకులను పట్టి పీడిస్తున్నారు. తాజాగా ఏసీబీ అధికారుల వలలో మరో తిమింగళం చిక్కుకుంది. కాప్రా మున్సిపాలిటీ కార్యాలయం డీఈగా పనిచేస్తున్న మహాలక్ష్మీ లంచం తీసుకుంటూ.. అవినీతి అధికారులకు పట్టుబడింది. జిహెచ్ఎంసి స్వీపర్ సాలెమ్మ భర్త మృతిచెందగా ఆమెభర్త ఉద్యోగం సాలెమ్మకు వచ్చింది. దీంతో ఆమె డిఈ మహా లక్ష్మిని కలిసారు. అయితే ఇరవై వేలు లంచంగా ఇస్తేనే ఉద్యోగంలో పని చేయాలని లేదంటే ఉద్యోగం నుండి తీసి వేస్తామని బెదిరించింది. లంచం కావాలని డిమాండ్ చేసింది. దీంతో సాలెమ్మ కొడుకు శ్రీనివాస్ ఏసీబీ అధికారులను ఆశ్రయించాడు. మల్లాపూర్ శివ పార్వతి హోటల్ లో డీఈ మహాలక్ష్మి 20 వేల రూపాయలు లంచంగా తీసుకున్న సమయంలో ఏసీబీ అధికారులు రెడ్ హ్యాండెడ్ గా పట్టుకున్నారు. మల్లాపూర్ వార్డు కార్యాలయంలో అధికారులు ఆమెను విచారిస్తున్నారు. కాప్రా మున్సిపాలిటీ కార్యాలయంతో పాటు ఆమె నివాసంలో ఏసీబీ అధికారులు సోదాలు చేస్తున్నారు. ఇప్పటి వరకు డీఈ నివాసంలో బంగారం, నగదు గుర్తించామని అధికారులు తెలిపారు. ఈరోజు సాయంత్రం సోదాలు పూర్తి అయిన తర్వాత అరెస్ట్ చేసి కోర్టులో హాజరుపరుస్తామని ఏసీబీ డీఎస్పీ సూర్యనారాయణ పేర్కొన్నారు.