సీఎం కేసీఆర్‌కు ఎంపీ రఘురామ లేఖ

తెలంగాణ ముఖ్యమంత్రి కేసీఆర్ కు ఎంపీ రఘురామకృష్ణంరాజు లేఖ రాశారు. తన అరెస్టు సమయంలో నిబంధనలు ఉల్లంఘించారంటూ ఆయన ఆరోపించారు. తెలంగాణ పోలీసులపై చర్యలు తీసుకోవాలని లేఖలో రఘురామ కోరారు. ప్రజా ప్రతినిధిని అరెస్టు చేసే సమయంలో పొరుగు రాష్ట్ర పోలీసులు అనుసరించాల్సిన విధివిధానాలు, మార్గదర్శకాలను గచ్చిబౌలి స్టేషన్‌ హౌస్‌ ఆఫీసర్‌ (ఎస్‌హెచ్‌వో) పట్టించుకోలేదని వైసీపీ ఎంపీ రఘురామ కృష్ణంరాజు తెలంగాణ రాశారు. ఆ అధికారిపై క్రమశిక్షణ చర్యలు తీసుకోవాలని కోరారు. పలు సందర్భాల్లో న్యాయస్థానాలు ఇచ్చిన తీర్పులు, పోలీసు మాన్యువల్‌ చెబుతున్న మార్గదర్శకాలను అందులో వివరించారు. ఈనెల 14న తన అరెస్టు సమయంలో చోటుచేసుకున్న నిబంధనల ఉల్లంఘనను వివరిస్తూ... కేసీఆర్‌కు శనివారం 8 పేజీల లేఖ రాశారు. ఏపీ సీఐడీ పోలీసులు తనను అరెస్టు చేసేందుకు వచ్చినప్పుడు గచ్చిబౌలి స్టేషన్‌ హౌస్‌ ఆఫీసర్‌ కనీస పోలీసు మాన్యువల్స్‌ను కూడా పట్టించుకోలేదని లేఖలో పేర్కొన్నారు. ఎంపీగా ఉన్న తనను అరెస్టుకు సంబంధించిన ప్రాథమిక సమాచారాన్ని కూడా పరిశీలించలేదని తెలిపారు. ఏపీసీఐడీ నుంచి ట్రాన్సిట్‌ రిమాండ్‌ ఆర్డరు తీసుకోలేదన్నారు. అసలు ఎఫ్‌ఐఆర్‌ ఉందో లేదో కూడా పరిశీలించలేదని రఘురామ లేఖలో ఆరోపించారు. అరెస్టు చేసే ముందు తన ఆరోగ్య పరిస్థితిపై స్థానిక ఆసుపత్రిలో పరీక్షలు చేయించాలన్న నిబంధనను పట్టించుకోలేదన్నారు. తనను కారులోకి నెట్టేస్తున్నా గచ్చిబౌలి ఎస్‌హెచ్‌ఓ స్పందించలేదన్నారు. తనను అరెస్టు చేసేందుకు ఆంధ్రప్రదేశ్‌ సరిహద్దును దాటేముందు ప్రస్తుతమున్న నిబంధనలు, మార్గదర్శకాల మేరకు తెలంగాణ ప్రభుత్వ అనుమతిని ఏపీసీఐడీ తీసుకోలేదని ఆరోపించారు. తెలంగాణ పోలీసులు ‘రూల్‌ ఆఫ్‌ లా’ను అమలుచేసేలా చర్యలు తీసుకోవాలని కేసీఆర్‌ను కోరారు. సీఐడీ అడిషనల్‌ ఎస్పీ విజయపాల్‌ బృందంతోపాటు తన నివాసానికి వచ్చిన గచ్చిబౌలి పోలీసు సిబ్బందిపై క్రమశిక్షణ చర్యలు తీసుకోవాలని సీఎంను రఘురామ కోరారు.