ముఖ్యమంత్రి వైఎస్ జగన్మోహన్‌రెడ్డిపై నమోదయిన అక్రమాస్తుల కేసుల్లో కొత్తగా మరొకటి చేరింది. ఇప్పటికే 11 కేసులు, కేసులు ఉండగా తాజాగా కేసుతో కలిసి ఈ సంఖ్య 18కి చేరింది. ఉమ్మడి ఆంధ్రప్రదేశ్ హౌసింగ్ బోర్డు, ఇందూ కంపెనీ సంయుక్తంగా చేపట్టిన హౌసింగ్ ప్రాజెక్ట్‌ అక్రమాలపై ఎన్‌ఫోర్స్‌మెంట్‌ డైరెక్టరేట్‌ (ఈడీ) గత ఏడాది దాఖలు చేసిన ఛార్‌షీట్‌పై ఈడీ ప్రత్యేక న్యాయస్థానం విచారణ చేపట్టింది. గతేడాది ఛార్జ్‌షీట్ దాఖలు చేసినా పలు లోపాల ఉండటంతో కోర్టు పలుమార్లు వెనక్కి పంపింది. సమగ్ర వివరాలతో ఈడీ దాఖలు చేసిన ఛార్జ్‌షీట్‌పై ఏప్రిల్‌ 23న విచారణ ప్రక్రియ ప్రారంభం కాగా.. శుక్రవారం మరోసారి విచారణ జరిగింది. ఈ కేసులో 11 మందిని నిందితులుగా పేర్కొంది. వైఎస్ జగన్‌మోహన్‌రెడ్డి, ఐ.శ్యాంప్రసాద్‌రెడ్డి, జితేంద్ర మోహన్‌దాస్‌ వీర్వాణి, టీటీడీ ఛైర్మన్ వైవీ సుబ్బారెడ్డి, వైఎస్ఆర్సీపీ ఎమ్మెల్యే వీవీ కృష్ణప్రసాద్‌, ఇందూ ప్రాజెక్ట్స్‌ ప్రైవేట్‌ లిమిటెడ్‌, చిడ్కో, ఇందూ ఈస్ట్రన్‌ ప్రావిన్స్‌ ప్రాజెక్ట్స్‌ లిమిటెడ్‌, ఇందూ రాయల్‌ హోమ్స్‌, వసంత ప్రాజెక్ట్స్‌, ఎంబసీ ప్రాపర్టీ డెవలప్‌మెంట్‌ ప్రైవేట్‌ లిమిటెడ్‌లను చేర్చింది. నిందితులపై మనీలాండరింగ్‌ నిరోధక చట్టంలోని సెక్షన్‌ 4, 3 కింద ఫిర్యాదు దాఖలు చేసింది. దీనిపై తదుపరి విచారణ జూన్‌ 30న జరగనుంది. ఈ కేసుకు సంబంధించి ఈడీ ఇప్పటికే రూ.117 కోట్ల ఆస్తులను జప్తు చేసిన విషయం తెలిసిందే. అక్రమాస్తుల కేసుల్లో తొలుత ఎంపీ విజయసాయిరెడ్డి పేరు కనిపించలేదు. సీబీఐ కేసులు 11, ఈడీ ఇప్పటిదాకా దాఖలు చేసిన 6 చార్జ్‌షీట్‌లు సహా మొత్తం 17 కేసుల్లోనూ ఏ2గా విజయసాయిరెడ్డి పేరు ఉంది. హౌసింగ్ బోర్డు అక్రమాలపై దాఖలు చేసిన అభియోగ పత్రంలోనూ రెండో నిందితుడిగా ఉన్న విజయసాయిరెడ్డి పేరును ఈడీ తన ఫిర్యాదులో తొలగించింది. విజయసాయిరెడ్డితో పాటు సీబీఐ కేసులో నిందితుల జాబితాలో ఉన్న జగన్‌కు చెందిన కార్మెల్‌ ఏసియా లిమిటెడ్‌ను, ఐఏఎస్‌ అధికారి ఎస్‌.ఎన్‌.మొహంతిని కూడా నిందితుల జాబితా నుంచి ఈడీ తొలగించింది. హౌసింగ్ బోర్డు నుంచి హైదరాబాద్‌లోని కూకట్‌పల్లి, గచ్చిబౌలి, బండ్లగూడ, కర్నూలు జిల్లా నంద్యాలలో ప్రాజెక్టులను ఇందూ గ్రూపు అక్రమంగా పొందిందని సీబీఐ పేర్కొంది.
0 Comments