శ్రీచైతన్య విద్యాసంస్థలకు షాక్.. రూ.100కోట్ల విలువైన సాఫ్ట్‌వేర్ చోరీ, వాళ్ల పనేనా?

జిల్లాలోని శ్రీ చైతన్య విద్యా సంస్ధలలో భారీ చోరీ జరిగింది. కంకిపాడు మండలం పునాదిపాడు క్యాంపస్ పరిధిలో రూ.100 కోట్ల విలువైన సాఫ్ట్‌వేర్ చోరీకి గురైనట్లు ఏజీఎం కంకిపాడు మురళీకృష్ణ పోలీసులకు ఫిర్యాదు చేశారు. దీంతో ఈ ఘటనపై కేసు నమోదు చేసిన పోలీసులు దర్యాప్తు చేపట్టారు. వివరాల్లోకి వెళ్తే... చైతన్య విద్యాసంస్ధల నిర్వహణ కోసం సుమారు రూ.100 కోట్ల విలువైన సాఫ్ట్ వేర్ ను యాజమాన్యం వినియోగిస్తోంది. కాలేజీ సమాచారంతో పాటు విద్యార్థుల వివరాలను భద్రంగా ఉంచేందుకు అన్ని భద్రతలతో కూడిన ఈ సాఫ్ట్‌వేర్‌ను కొనుగోలు చేసింది. ఇటీవల సంస్ధకు చెందిన సాఫ్ట్‌వేర్ పని చేయకపోవటం, విద్యార్ధుల వివరాలు, నగదుకు సంబంధించిన వివరాల్లో సమగ్రత లోపించటంతో శ్రీచైతన్య కాలేజీ యాజమాన్యానికి అనుమానం వచ్చింది. దీంతో ఆరా తీయగా కాలేజీలో గతంలో పనిచేసిన కొందరు ఉద్యోగులు సాఫ్ట్‌వేర్‌ను హ్యాక్ చేసి విద్యార్థుల నుంచి ఫీజులు సేకరించినట్లు తేలింది. దీంతో గతంలో కాలేజీలో పనిచేసిన ఎగ్జిక్యూటివ్ డీన్ నరేంద్రబాబు, డీన్ శ్రీనివాసరావు, బాలకృష్ణ ప్రసాద్‌లపై తమకు అనుమానం ఉన్నట్లు యాజమాన్యం పోలీసులకు ఇచ్చిన ఫిర్యాదులో పేర్కొన్నారు. విద్యార్ధులకు సంబంధించిన డేటాను సైతం వారు దొంగిలించినట్లు తెలుస్తోంది. ఈ డేటా ఆధారంగా పెనమలూరులో శ్రీ గోస లైట్స్ మెడికల్ అకాడమీ పేరిట మరొక విద్యాసంస్ధను ఏర్పాటు చేసిన నిందితులు తమ విద్యార్ధుల తల్లిదండ్రులకు ఫోన్లు చేస్తూ వారికి తక్కువ ఫీజులు తీసుకుంటామని చెబుతున్నట్లు తెలుస్తోంది. విద్యార్ధుల తల్లిదండ్రులే ఈ విషయాన్ని శ్రీచైతన్య విద్యాసంస్ధల దృష్టికి తీసుకురావడంతో ఆందోళనకు గురైన యాజమాన్యం పోలీసులను ఆశ్రయించింది.