ఐపీఎల్ 2021 సీజన్‌లో ఢిల్లీ క్యాపిటల్స్ యువ ఓపెనర్ సంచలన హిట్టింగ్ చేసేశాడు. కోల్‌కతా నైట్‌రైడర్స్‌తో అహ్మదాబాద్‌లోని నరేంద్ర మోడీ స్టేడియం వేదికగా గురువారం రాత్రి జరిగిన మ్యాచ్‌లో కేవలం 41 బంతుల్లోనే 11 ఫోర్లు, 3 సిక్సర్లు బాదిన పృథ్వీ షా.. 82 పరుగులు చేశాడు. దాంతో.. 155 పరుగుల లక్ష్య ఛేదనని ఢిల్లీ క్యాపిటల్స్ 16.3 ఓవర్లలోనే 156/3తో ఛేదించేసింది. ఢిల్లీని ఒంటిచేత్తో గెలిపించిన పృథ్వీ షాకి మ్యాన్ ఆఫ్ ద మ్యాచ్ అవార్డు లభించింది. ఛేదనని పృథ్వీ షా టాప్‌గేర్‌లో ప్రారంభించాడు. ఇన్నింగ్స్ మొదటి ఓవర్ వేసిన శివమ్ మావి.. తొలి బంతిని వైడ్ రూపంలో సంధించాడు. ఆ తర్వాత వరుసగా ఆరు బంతుల్నీ పృథ్వీ షా 4, 4, 4, 4, 4, 4 మలిచేశాడు. బంతి ఎలాంటిదైనా.. తన మార్క్ షాట్‌తో అతను బౌండరీకి తరలించడంతో.. శివమ్ మావి తలపట్టేసుకున్నాడు. కోల్‌కతా కెప్టెన్ ఇయాన్ మోర్గాన్ కూడా ఫీల్డర్లని మార్చుతూ.. శివమ్ మావీకి సూచనలు చేసినా లాభం లేకపోయింది. ఆ తర్వాత కూడా పృథ్వీ షా మిగిలిన బౌలర్లపై కూడా ఆధిపత్యం చెలాయించాడు. దాంతో పృథ్వీ షా ఉన్నంత సేపు మళ్లీ శివమ్ మావి చేతికి బంతినిచ్చే సాహసం మోర్గాన్ చేయలేకపోయాడు. మొత్తంగా.. మ్యాచ్‌లో ఒకే ఒక ఓవర్ వేసిన శివమ్ మావి 25 పరుగులు సమర్పించుకున్నాడు. ఐపీఎల్ చరిత్రలో ఇలా ఒకే ఓవర్‌లో ఆరు ఫోర్లు కొట్టిన రెండో బ్యాట్స్‌మెన్‌గా పృథ్వీ షా నిలిచాడు. రాజస్థాన్ రాయల్స్ బ్యాట్స్‌మెన్ అజింక్య రహానె 2012 ఐపీఎల్ సీజన్‌లో రాయల్ ఛాలెంజర్స్ బెంగళూరు బౌలర్ ఎస్. అరవింద్ బౌలింగ్‌లో వరుసగా ఆరు ఫోర్లు కొట్టాడు. మళ్లీ ఇన్నాళ్లకి పృథ్వీ షా ఆ ఫీట్ సాధించాడు.
0 Comments