ప్రజలకు హెచ్చరిక. రాష్ట్రంలో కరోనా మహమ్మారి మళ్లీ విలయతాండవం చేస్తున్న నేపథ్యంలో ప్రభుత్వం కఠిన నిబంధనలు అమలు చేస్తోంది. ఈ క్రమంలోనే బహిరంగ ప్రదేశాల్లో సంచరించేవారు తప్పనిసరిగా మాస్కులు ధరించాలని నిబంధన విధించింది. అయితే దీనిపై ప్రజల్లో మార్పు కనిపించకపోవడంతో అధికార యంత్రాంగం కఠినచర్యలు పూనుకుంటోంది. కోవిడ్ నిబంధనలను ఉల్లంఘించే వారికి వెయ్యి రూపాయలకు తగ్గకుండా జరిమానా విధించడంతో పాటు రెండేళ్ల జైలుశిక్ష పడేలా చట్టాలను అమలు చేయాలని నిర్ణయించింది. ప్రభుత్వ ప్రధాన కార్యదర్శి సోమేశ్‌కుమార్‌ ఈ మేరకు ఉత్తర్వులు జారీచేశారు. మాస్క్ లేకుండా బహిరంగ ప్రదేశాల్లోకి వచ్చేవారిపై డిజాస్టర్‌ మేనేజ్‌మెంట్‌ చట్టం-2005లోని సెక్షన్‌ 51 నుంచి 60 కింద, ఐపీసీ సెక్షన్‌ 188 కింద చర్యలు తీసుకోవాలని సూచిస్తూ కలెక్టర్లు, మేజిస్ట్రేట్లు, పోలీస్‌ కమిషనర్లు, ఎస్పీలను సీఎస్‌ సోమేశ్‌కుమార్‌ ఆదేశించారు. దీని ప్రకారం మాస్క్ ధరించకుండా తిరిగేవారికి అధికారులు కనీసం వెయ్యి రూపాయల జరిమానా విధించనున్నారు. ఆయా పరిస్థితులను బట్టి జరిమానా మొత్తం మరింత పెంచడంతో పాటు రెండేళ్ల వరకు జైలుశిక్ష పడేలా కఠినచర్యలు తీసుకోనున్నారు. ఒకరి నుంచి మరొకరికి సోకకుండా ఉండాలన్న ఉద్దేశంతోనే మాస్కు ధరించడాన్ని ప్రభుత్వం తప్పనిసరి చేసిందని అధికారులు చెబుతున్నారు. కరోనాను అడ్డుకోవాలంటే కేవలం అధికార యంత్రాంగం కఠినంగా ఉంటే సరిపోదని, ప్రజలు కూడా అప్రమత్తంగా ఉన్నప్పుడు ఆ మహమ్మారిని తరిమికొట్టగమని సూచిస్తున్నారు. అందుకే మాస్క్ పెట్టుకుంటే ఆరోగ్యంగా ఉండటంతో పాటు జేబుకు పడే చిల్లు నుంచి తప్పించుకోవచ్చని హెచ్చరిస్తున్నారు.
0 Comments