విశాఖ: రేషన్ పంపిణీ వాహనాల టైర్లు మాయం.. షాకైన స్థానికులు, ఏమైందంటే

విశాఖ జిల్లాలో రేషన్ పంపిణీ వాహనం టైర్లు మాయం కావడం కలకలంరేపింది. పెదగంట్యాడ మండల కార్యాలయం కేంద్రంగా 19 రేషన్ పంపిణీ వాహనాలు ప్రతి నెలా మొదటివారం నుంచే రేషన్‌ పంపిణీ చేస్తున్నాయి. వీటిలో 5 ట్రక్కులను డ్రైవర్లు కార్యాలయ ఆవరణలో పార్కు చేశారు. మంగళవారం ఉదయం డ్రైవర్లు వచ్చి చూడగా.. రెండు ట్రక్కులకు టైర్లు మాయం అయ్యాయి. ఓ ట్రక్కు డోర్‌ అద్దం పగిలి ఉంది. ఈ ఘటనపై డ్రైవర్లు మణిబాబు, అప్పలరాజు ఫిర్యాదు మేరకు పోలీసులు కేసు నమోదు చేసి, దర్యాప్తు చేస్తున్నారు. ఏకంగా ప్రభుత్వ కార్యాలయంలోనే ఇలా వాహనాల టైర్లు మాయం కావడం సంచలనంగా మారింది. పోలీసులు ఆ చుట్టుపక్కల ఉన్న సీసీ కెమెరాల ఫుటేజ్ పరిశీలిస్తున్నారు. వాహనాల డ్రైవర్లు కూడా ఆందోళన వ్యక్తం చేశారు.