టోక్యో వేదికగా జరుగుతున్న పారాలింపిక్స్‌లో భారత టేబుల్ టెన్నిస్ క్రీడాకారిణి భవీనా పటేల్.. దేశానికి పతకాన్ని ఖాయం చేసింది. శనివారం చైనాకి చెందిన జాంగ్ మియావోతో మహిళల సింగిల్స్ క్లాస్ 4 టేబుల్ టెన్నిస్ సెమీస్‌లో తలపడిన భవీనా పటేల్ 7-11, 11-7, 11-4, 9-11, 11-8 తేడాతో విజయం సాధించి.. ఫైనల్లో అడుగుపెట్టింది. ఆదివారం ఫైనల్లో భవీనా పటేల్ గెలిస్తే..? భారత్‌కి పసిడి పతకం దక్కనుంది. ఒకవేళ ఓడినా.. రజతం ఖాయం. మొత్తంగా.. పారాలింపిక్స్‌ చరిత్రలో టేబుల్ టెన్నిస్‌లో భారత్‌కి పతకం దక్కనుండటం ఇదే తొలిసారి. వాస్తవానికి 2016 రియో ఒలింపిక్స్‌లోనే భవీనా పటేల్ పతకం సాధించేలా కనిపించింది. ఆ మెగా టోర్నీకి భవీనా పటేల్ ఎంపికైనా.. సాంకేతిక కారణాల వల్ల పాల్గొనలేకపోయింది. కానీ.. టోక్యో పారాలింపిక్స్‌లో అంచనాలకి మించి రాణిస్తున్న 34 ఏళ్ల భవీనా పటేల్.. తన కంటే మెరుగైన ర్యాంక్‌లో ఉన్న ప్రత్యర్థులని సైతం మట్టికరిపిస్తోంది. శుక్రవారం జరిగిన క్వార్టర్స్‌లోనూ సెర్బియా‌కి చెందిన పెరిచ్ రాంకోవిచ్‌పై 11-5, 11-6, 11-7 తేడాతో ఆమె విజయం సాధించింది. పెరిచ్ డిఫెండింగ్ ఛాంపియన్‌కాగా.. 12వ ర్యాంక్‌లో ఉన్న భవీనా పటేల్ ఆమెని చిత్తుగా ఓడించడం విశేషం. గుజరాత్‌కి చెందిన భవీనా పటేల్ పోలియో కారణంగా చక్రాల కుర్చీకి పరిమితమైంది. మొదట్లో ఫిట్‌‌నెస్ కోసం సరదాగా టేబుల్ టెన్నిస్ ఆడటం స్టార్ట్ చేసిన భవీనా పటేల్.. ఆ తర్వాత ఈ గేమ్‌ని కెరీర్‌గా ఎంచుకుని కష్టపడింది. ఒత్తిడిని జయించడం.. మొదట్లో వెనుకబడినా మధ్యలో పుంజుకోవడాన్ని బాగా అలవాటు చేసుకున్న భవీనా పటేల్.. సెమీస్‌లోనూ అదే పోరాట పటిమని కనబర్చింది. మొత్తంగా పారాలింపిక్స్‌లో పతకం గెలిచిన భారత రెండో అథ్లెట్‌గా అరుదైన ఘనత సాధించింది. 2016లో దీపా మాలిక్ రజత పతకం గెలుపొందిన విషయం తెలిసిందే.
0 Comments