పోలీస్ స్టేషన్లో ఇలాంటి సన్నివేశాలను ఎప్పుడూ చూసుండరు. లేడీ కానిస్టేబుల్‌కు ఠాణాలోనే ఘనంగా శ్రీమంతం వేడుకలు నిర్వహించారు. సీఐ చొరవతో నిర్వహించిన ఈ కార్యక్రమానికి ఉన్నతాధికారులు సైతం హాజరయ్యారు. ఈ మహిళ పేరు కోట బంగారమ్మ. గుంటూరు జిల్లా పోలీస్ స్టేషన్లో గత మూడేళ్లుగా కానిస్టేబుల్‌గా విధులు నిర్వహిస్తున్నారు. సీఐ సురేంద్ర బాబు చొరవతో ఈ ఆడబిడ్డకు తోటి సిబ్బంది సంప్రదాయబద్ధంగా శ్రీమంతం జరిపించారు. మహిళా సిబ్బంది ఆమెను అందంగా ముస్తాబు చేయించి, కాళ్లకు పసుపు రాసి, చేతికి గాజులు తొడిగారు. తమ తోబుట్టువుకు చేసినట్లే వేడుక నిర్వహించారు. పోలీసు అధికారులే అయినా తమలోని స్త్రీత్వాన్ని ఆవిష్కరించారు. అమ్మవడం ప్రతి మహిళ జీవితంలోనూ ఓ మధురానుభూతి. బంగారమ్మకు ఆ అనుభూతిని మరింత మధురం చేసింది ఈ పోలీస్ కుటుంబం. పోలీస్ స్టేషన్‌లోనే తనకు శ్రీమంతం జరపడం, సీఐ, డీఎస్పీ సహా స్టేషన్లో పని చేసే సిబ్బంది అందరూ పాల్గొనటం చాలా ఆనందంగా ఉందని బంగారమ్మ ఆనందం వ్యక్తం చేశారు. కరోనా సంక్షోభ సమయంలో ఫ్రంట్‌లైన్ వారియర్లుగా విలువైన సేవలు అందించిన కొంత మంది పోలీసులు ఠాణాలోనే తమ బర్త్ డేను జరుపుకొన్న ఘటనలు గతంలో జరిగాయి. ముఖ్యంగా లాక్‌డౌన్ సమయంలో ఇలాంటివి చోటు చేసుకున్నాయి. కానీ, పోలీస్ స్టేషన్లో శ్రీమంతం వేడుక నిర్వహించడం ఇదే తొలిసారని అధికారులు చెప్తున్నారు.
0 Comments