9నెలల పసికందు మృతి.. భార్య పన్ను పీకేసిన భర్త

ఖమ్మంలో క్షుద్ర పూజలు కలకలం రేపాయి. తమ బిడ్డ మృతికి పక్కింటి మహిళే కారణమని ఆమెపై దాడి చేశారు. అంతేకాకుండా ఆమె పన్ను కూడా పీకేశారు. ఈ ఘటన జిల్లాలోని మధిరలో సంచలనం రేపింది. వివరాల్లోకి వెళ్తే.. ఎస్సీ కాలనీలో గద్దల బుజ్జీ కుటుంబం నివసిస్తోంది. బుజ్జి 9నెలల బాబు అనారోగ్యం బారిన పడ్డాడు. దీంతో బాబు వైద్యం కోసం దాదాపు రెండు లక్షల రూపాయలు ఖర్చు చేశారు. అయినా కూడా ప్రాణం దక్కలేదు. చిన్నారి ఇటీవలే చనిపోయాడు. అయితే తన బిడ్డ మృతికి పక్కింట్లోని కుటుంబం వారే కారణమంటూ బుజ్జీ పక్కింట్లో ఉంటున్న గద్దల మోహనరావు, ఆయన భార్య సుగుణపై దాడికి దిగారు. వారి కారణంగానే తన బిడ్డ చనిపోయాని బుజ్జికి అనుమానం కలిగింది. దీనికితోడు బుజ్జి ఇంటి ముందు నిమ్మకాయలు, పసుపు, కుంకుమ జల్లి ఉండడంతో ఈ అనుమానాలు మరింత బలపడ్డాయి. ఈ క్రమంలో బుజ్జి కుటుంబం మోహనరావు ఇంటికి వెళ్లింది. అక్కడ క్షుద్ర పూజలు చేసిన సామాగ్రి దొరికింది. దీంతో తమ చిన్నారి మృతికి వారే కారణమని బుజ్జి ఆగ్రహించాడు. వారిని చితకబాదాడు. అంతేకాదు భర్త మోహనరావుతోనే సుగుణ పన్ను పీకించారు. దీంతో వారు పోలీస్ స్టేషన్‌లో ఫిర్యాదు చేశారు. పోలీసులు కేసు నమోదు చేసి దర్యాప్తు చేపట్టారు.