తాను పాకిస్థాన్‌కి చెందిన వాడినన్న విషయం దాచిపెట్టి హైదరాబాద్ యువతిని పెళ్లి చేసుకున్న వ్యక్తి బాగోతం తాజాగా వెలుగులోకి వచ్చిది. మహ్మద్‌ అబ్బాస్‌ ఇక్రమ్ అనే పాకిస్థానీ.. విజిటింగ్ వీసా మీద దుబాయ్‌లో కచేరీలు చేస్తుంటాడు. హైదరాబాద్ చాదర్‌ఘాట్‌లో నివసించే ఓ యువతి కూడా దేశవిదేశాల్లో పాటలు పాడుతుంటారు. తొమ్మిదేళ్ల క్రితం ఇక్రమ్ ఆమెకు దుబాయ్‌లో పరిచయమయ్యాడు. తాను దిల్లీకి చెందిన ముస్లింగా పరిచయం చేసుకున్న అతడు పెళ్లి చేసుకుంటానని ప్రతిపాదించగా ఆమె అంగీకరించారు. యువతి హైదరాబాద్‌కు చేరుకున్న నెల రోజుల్లోనే అతనూ ఇక్కడికి వచ్చాడు. ఇద్దరూ పెళ్లి చేసుకున్నారు. ఇందుకోసం ఆమె ఇస్లాం మతం స్వీకరించారు. చాదర్‌ఘాట్‌లో కాపురం పెట్టారు. కొన్నాళ్ల తర్వాత ఆమె దిల్లీలోని అత్తారింటికి వెళ్దామని అడగ్గా.. అప్పుడు అసలు విషయం చెప్పాడు. తాను పాకిస్థాన్‌ వాసినని, విజిటింగ్ వీసాతో భారత్‌కు వచ్చానని చెప్పడంతో కంగతింది. ఈ విషయం ఎవరికైనా చెబితే చంపేస్తానని బెదిరించడంతో ఆమె మౌనంగా ఉండిపోయి భయంభయంగానే అతడితో కలిసి ఉంటోంది. ఈ క్రమంలోనే వారికి ఓ కుమార్తె జన్మించింది. ఇక్రమ్ భారత్‌లోనే ఉండిపోవాలని నిర్ణయించుకుని చాదర్‌ఘాట్‌లో నివసించే నిజాం ఖాజా ద్వారా ఆధార్‌ కార్డు, వరంగల్‌లో ఉంటున్న అతడి స్నేహితుడి ద్వారా పది, ఇంటర్‌ సర్టిఫికెట్లు సమకూర్చుకున్నాడు. వాటిని ముంబయిలో రాష్ట్రీయ విద్యాపీఠ్‌ పేరుతో నకిలీ యూనివర్సిటీ నిర్వహిస్తున్న రమేష్‌ మూలేకి పంపి హోటల్‌ మేనేజ్‌మెంట్‌ డిగ్రీ పట్టాను రూ. 10 వేలకు కొనగోలు చేశాడు. అవే నకిలీ పత్రాలతో ఏడేళ్ల కిందట భారత పాస్‌పోర్టు తీసుకున్నాడు. అయితే తనను ఎన్న చిత్రహింసలు పెట్టినా భరించిన అతడి భార్య ఆరేళ్ల కుమార్తె పట్ల అసభ్యంగా ప్రవర్తించడాన్ని మాత్రం చూసి తట్టుకోలేకపోయింది. మూడేళ్ల క్రితం చాదర్‌ఘాట్ పోలీసులకు ఫిర్యాదు చేయడంతో సీఐ భద్రంరాజు రమేష్‌ 2018 జులైలో ఇక్రమ్‌ను అరెస్ట్ చేసి జైలుకు పంపారు. అతడి ఇంట్లో చేసిన తనిఖీల్లో పాస్‌పోర్టు లభించడంతో పోలీసులు షాకయ్యారు. అతడి ఆధార్‌ కార్డు, సర్టిఫికెట్లన్నీ నకిలీవేనని తేల్చారు. పాస్‌పోర్టును కేంద్ర హోం మంత్రిత్వ శాఖకు పంపించగా ఇక్రమ్ పాకిస్థాన్‌ పౌరుడేనని ధ్రువీకరించింది. ఈ కేసుపై విచారించిన నాంపల్లి కోర్టు తాజాగా ఇక్రమ్‌ను దోషిగా తేల్చి ఐదేళ్ల జైలుశిక్ష విధించింది. అతడికి నకిలీ హోటల్‌ మేనేజ్‌మెంట్‌ డిగ్రీ ధ్రువపత్రం ఇచ్చిన రమేష్‌ మూలేకూ ఐదేళ్ల జైలుశిక్ష విధించింది.
0 Comments