ఆ మూడు జిల్లాలు ఎడారే.. జగన్‌కి కేసీఆర్ అమ్ముడుపోయారు: రేవంత్ రెడ్డి

పాలమూరు- రంగారెడ్డి ప్రాజెక్టుపై నేషనల్‌ గ్రీన్‌ ట్రైబ్యునల్‌ (ఎన్జీటీ) స్టే ఇవ్వడంతో దక్షిణ తెలంగాణకు మరణ శాసనం కిందే లెక్కని టీపీసీసీ చీఫ్ రేవంత్ రెడ్డి అన్నారు. ముఖ్యమంత్రి కేసీఆర్‌ స్వప్రయోజనాల కోసం ఏపీ సీఎం జగన్‌ వద్ద రైతుల హక్కులు తాకట్టు పెట్టారని ఆరోపించారు. 2017లో కేంద్ర పర్యావరణ శాఖకు అనుమతుల కోసం పెట్టిన దరఖాస్తులను రాష్ట్ర ప్రభుత్వం ఉపసంహరించుకోవడం వల్లే ఎన్జీటీ స్టే విధించే పరిస్థితి వచ్చిందని రేవంత్ అన్నారు. దరఖాస్తులను ఎవరి ఒత్తిడికి తలొగ్గి వెనక్కి తీసుకున్నారో కేసీఆర్ చెప్పాలని డిమాండ్ చేశారు. పర్యావరణ అనుమతులు వచ్చేలోపే ఏపీ ప్రభుత్వం పట్టిసీమ ప్రాజెక్టు పూర్తి చేయడంతో ఎన్జీటీ జరిమానాతో సరిపెట్టిందని చెప్పిన రేవంత్... పాలమూరు ప్రాజెక్టు కూడా వేగంగా పూర్తిచేసి ఉంటే ఈ పరిస్థితి వచ్చేది కాదని అభిప్రాయపడ్డారు. ఇప్పుడు ఎన్టీజీ స్టే ఇవ్వడంతో పాలమూరు, రంగారెడ్డి, నల్గొండ జిల్లాలు ఎడారిగా మారే ప్రమాదం ఉందని ఆందోళన వ్యక్తం చేశారు. తాజా పరిణామాలతో పాలమూరు రంగారెడ్డి, కల్వకుర్తి ప్రాజెక్టులు సమాధి కాబోతున్నాయని, దీనికి ముఖ్యమంత్రి కేసీఆరే బాధ్యత వహించాలన్నారు.