తిరుమలకు వెళ్లే భక్తులకు అలర్ట్.. కొత్త తరహా మోసం, నమ్మారో మోసపోతారు

శ్రీవారి దర్శనం పేరుతో ఓ సంస్థ చేస్తున్న నిర్వాకం బయటపడింది. తమిళులు పవిత్రంగా భావించే పురటాసి మాసంలో శ్రీవారి వీఐపీ బ్రేక్‌ దర్శనం కల్పిస్తామంటూ సోషల్‌ మీడియాలో ప్రకటన ఇచ్చింది. చెన్నైకి చెందిన ఈ సంస్థ.. రూ.111,116కు చెన్నైబెంగళూరు, కోయంబత్తూరు నుంచి తిరుపతికి రానూపోనూ ప్రయాణ సౌకర్యం, ఫైవ్‌ స్టార్‌ హోటల్‌లో బసతో పాటు తిరుమల, తిరుచానూరులో బ్రేక్‌ దర్శనం కల్పిస్తామన్నారు. ఈ ప్రకటనపై సీరియస్‌గా స్పందించింది. ఈ ప్రకటన ఇచ్చిన యాత్ర, టూర్స్‌సంస్థపై చర్యలు తీసుకోనున్నట్లు టీటీడీ తెలిపింది. వీఐపీ బ్రేక్‌ టికెట్లను ప్రొటోకాల్‌ పరిధిలోని ప్రముఖులకు, వారు సిఫార్సు చేసేవారికి మాత్రమే టీటీడీ కేటాయిస్తుందని.. ఇలాంటి ప్రకటనలను నమ్మవద్దని సూచించింది. భక్తులను మోసగిస్తున్న ఈ యాత్రా సంస్థపై న్యాయపరమైన చర్యలు తీసుకోనున్నట్లు హెచ్చరించింది. మరోవైపు శ్రీవారి దర్శనం కల్పిస్తామని కొందరు దళారులు టీటీడీ ఛైర్మన్‌ వైవీ సుబ్బారెడ్డి పేరు ఉపయోగించి మోసాలకు పాల్పడుతున్నారు. సుపథం మార్గంలో దర్శనం కల్పిస్తామని.. రూ.300 ప్రత్యేక దర్శనం టోకెన్లు ఇప్పిస్తామని భువనగిరికి చెందిన భక్తులకు ఆశ కల్పించి మోసగిస్తున్నారు. టీటీడీ ఛైర్మన్‌ సిఫార్సు లేఖ ఇప్పిస్తామని చెప్పిన కొందరు దళారులు భక్తులకు మెసేజ్‌లు పంపారు. వారి నుంచి రూ.8 వేలు తీసుకొని ఈ మెసేజ్‌లు పంపినట్లు బాధితులు చెప్పారు. ఈ మెసేజ్‌లతో భక్తులు ఛైర్మన్‌ కార్యాలయానికి వెళ్లగా.. అవి నకిలీ సిఫార్సులుగా తేలింది. వెంటనే బాధితులు పోలీసులకు ఫిర్యాదు చేశారు. విచారణ చేపట్టిన పోలీసులు ఇద్దరు వ్యక్తులను అదుపులోకి తీసుకున్నారు. 11 టికెట్ల కోసం దళారులు రూ.16 వేలు ఒప్పందం చేసుకున్నట్లు సమాచారం. దళారుల మాయ మాటలు విని భక్తులు మోసపోవద్దని టీటీడీ అధికారులు సూచిస్తున్నారు. గతంలో కూడా పలువురు దళారుల్ని పోలీసులు అరెస్ట్ చేశారు.