ఏపీ: మీకు బైక్, కారు, ఇతర వాహనాలు ఉన్నాయా.. వెంటనే ఆ పనిచేయాల్సిందే, లేకపోతే చిక్కులే

వాహనాలు ఉన్నవారికి అలర్ట్.. ఇకపై ప్రతి వాహనానికి హై సెక్యూరిటీ నంబర్‌ ప్లేట్లు ఏర్పాటు చేయాల్సిందే. అలా చేయని పక్షంలో కేసులు నమోదు చేయడంతో పొటు, జరిమానా విధిస్తామని రవాణాశాఖ అధికారి వెంకటేశ్వరరావు తెలిపారు. సుప్రీంకోర్టు ఆదేశాలతో 2014 తర్వాత కొన్న కొత్త వాహనాలకు హై సెక్యూరిటీ నంబర్‌ ప్లేట్లు తప్పనిసరి అన్నారు. 2019 నుంచి డీలర్లకే నంబర్‌ ప్లేట్ల ఏర్పాటు బాధ్యత అప్పగించామని.. పలుచోట్ల డీలర్ల నిర్లక్ష్యం వల్ల నంబర్‌ ప్లేట్ల ఏర్పాటులో ఆలస్యం జరుగుతోందన్నారు. అందుకే వాహనదారులు ఇతర ఫ్యాన్సీ నంబర్‌ ప్లేట్లు ఏర్పాటు చేసుకుంటున్నారన్నారు. నిబంధనలకు విరుద్ధంగా తిరిగే వాహనాలు పట్టుకునేందుకు తనిఖీలు చేయాలని అన్ని జిల్లాల అధికారులను ఆదేశించారు. నంబర్‌ప్లేట్లు ఏర్పాటు చేసే డీలర్ల దగ్గర ఆలస్యం జరగకుండా తనిఖీలు చేయాలని నిర్ణయించారు. ముందుగా దీనిపై అవగాహన కల్పించేందుకు చర్యలు తీసుకుంటామని.. ఆ తర్వాత కేసులు నమోదు చేస్తామన్నారు. ప్రభుత్వ వాహనాలు, అద్దె వాహనాలు కచ్చితంగా హై సెక్యూరిటీ నంబర్‌ ప్లేట్లు ఉండాలన్నారు. నంబర్‌ ప్లేట్లు ప్రామాణికంగా ఉండటం లేదని ఎక్కువ ఫిర్యాదులు వస్తుండటంతో రవాణా శాఖ స్పందించింది. నిబంధనల ప్రకారం నంబర్‌ ప్లేట్లు అమర్చుకోని వారిని అప్రమత్తం చేసిన తర్వాత పోలీసులతో కలిసి చర్యలు చేపట్టనున్నారు. రాష్ట్రంలోని ప్రతి వాహన డీలర్‌ వాహనంతోపాటు నంబర్‌ ప్లేట్‌ ఇవ్వాల్సిందేనన్నారు. రిజిస్ట్రేషన్‌ సమయంలో డబ్బులు చెల్లిస్తున్నా ఎక్కువ మంది నంబర్‌ ప్లేట్లు తీసుకోవడం లేదన్నారు. మరోవైపు పండుగల సీజన్లలో ప్రైవేటు బస్సులు 2-3 రెట్లు టికెట్ల ధరలు వసూలు చేస్తున్నాయని.. అరికట్టడానికి ఎంవీఐలను అప్రమత్తం చేశామన్నారు. రవాణా పన్నులు చెల్లించకుండా తిరుగుతోన్న వాహనాలపై స్పెషల్‌ డ్రైవ్‌ మొదలు పెట్టామని.. డీటీసీలకు ఆదేశాలు వెళ్లాయన్నారు.