హైదరాబాద్‌లో జరుగుతున్న రోడ్డు ప్రమాదాలు జనాల్ని బెంబేలెత్తిస్తున్నాయి. తాజాగా పీవీ ఎక్స్‌ప్రెస్ హైవేపై ఓ కారు ప్రమాదం జరిగింది. కారు పల్టీలు కొట్టి బోల్తా పడింది. ఈ ఘటనలో కారు డ్రైవర్ తీవ్ర గాయాల పాలయ్యాడు. దీంతో అతడ్ని వెంటనే చికిత్స నిమిత్తం ప్రైవేట్ ఆస్పత్రికి తరలించారు. శంషాబాద్ విమానాశ్రయం నుండి మెహదీపట్నం వెళ్తున్న సమయంలో ఈ ఘటన చోటు చేసుకుంది. పిల్లర్ నెంబర్ 193 పైన మంత్ర మాల్ వద్ద ఓమినే కార్ డివైడర్‌ను ఢీకొట్టి పల్టీ కొట్టింది. కార్ లో డ్రైవర్ మాత్రమే ఉండటంతో అతనికి తీవ్ర గాయాలు అయ్యాయి. ప్రమాదానికి సంబంధించి సమాచారం అందిన వెంటనే.. రాజేంద్రనగర్ పోలీసులు సంఘటన స్థలానికి చేరుకున్నారు. డ్రైవర్‌ను ఆస్పత్రికి తరలించి, కేసు నమోదు చేసుకుని దర్యాప్తు చేపట్టారు.
0 Comments