జగన్‌ ఆదేశాలు.. లక్ష మందితో నాపై కుట్ర.. స్పీకర్‌కు ఎంపీ రఘురామ సంచలన లేఖ

జగన్ సర్కారును ఇరుకున పెట్టేందుకు వైసీపీ రెబల్ ఎంపీ తన అమ్ములపొదిలో ఉన్న అన్ని అస్త్రాలను సంధిస్తూ ఉక్కిరిబిక్కిరి చేస్తున్నారు. రాజద్రోహం కేసులో తనను అరెస్ట్ చేసి చిత్రహింసలు పెట్టిన వైనంపై గతంలోనే లోక్‌సభ స్పీకర్‌, కేంద్ర హోంశాఖ మంత్రికి ఫిర్యాదు చేయడంతో పాటు ఇతర రాష్ట్రాల ఎంపీల మద్దతు ఆయన కూడగట్టుకున్న సంగతి తెలిసిందే. తాజాగా ఏపీ ప్రభుత్వానికి ఆయన మరో షాకిచ్చారు. ముఖ్యమంత్రి జగన్‌మోహన్‌రెడ్డి నేతృతంలోని రాష్ట్ర ప్రభుత్వం తనను వేధించేందుకు, బెదిరించేందుకు అన్ని నిబంధనలు ఉల్లంఘిస్తూ చట్టవిరుద్ధమైన ప్రయత్నాలు చేస్తోందని పేర్కొంటూ లోక్‌సభ సభాపతి ఓం బిర్లాకు రఘురామకృష్ణరాజు లేఖ రాశారు. ‘పదో షెడ్యూల్‌ ప్రకారం నాపై అనర్హత వేటు వేయించేందుకు మా పార్టీ అనేక ప్రయత్నాలు చేసింది. ఆ షెడ్యూల్‌ ప్రకారం నాపై అనర్హతకు అవకాశం లేకపోవడంతో ఇతర ప్రయత్నాలు చేస్తోంది. ముఖ్యమంత్రి, మా పార్టీ అధ్యక్షుడు జగన్ ఆదేశాలతో పార్టీ అధికారిక వెబ్‌సైట్‌లో ఎంపీల జాబితా నుంచి నా పేరు తొలగించారు. దాని ప్రకారం నేను వారి పార్టీ సభ్యుడిని కాదు. ఈ విషయాన్ని నేను వారి దృష్టికి తీసుకెళ్లినా సరిదిద్దుకోవడం లేదు. పార్లమెంటు సభ్యత్వానికి రాజీనామా చేసేలా ఒత్తిడి పెంచేందుకు నాపై తప్పుడు కేసులు పెట్టారు’ ‘నా నియోజకవర్గ ప్రజలను కలుసుకోకుండా చేసిన ఈ పని నా పార్లమెంటరీ హక్కును కాలరాయడమే. ఆ ప్రయత్నాలు విఫలమవడంతో నా రాజీనామా కోరుతూ నా దిష్టిబొమ్మలు దహనం చేయించారు. దాడి చేస్తామని బెదిరించడంతో నేను కేంద్ర హోం శాఖను సంప్రదించడంతో నాకు వై క్యాటగిరీ భద్రత కల్పించారు. రాష్ట్ర ప్రభుత్వం సీబీసీఐడీతో నాపై అరాచకమైన రాజద్రోహం కేసు పెట్టించింది. ఈ అంశంపై నేను ఇప్పటికే హక్కుల ఉల్లంఘన నోటీసు ఇచ్చాను. తాజాగా నాకు వ్యతిరేకంగా ధర్నాలు, నిరాహార దీక్షలు చేయించేందుకు ప్రయత్నిస్తున్నట్లు తెలిసింది.’ ‘ ఏం చేసినా నేను రాజీనామా చేయకపోవడం, అనర్హత వేటు పడకపోవడంతో ఆంధ్రప్రదేశ్‌ ప్రభుత్వం నా నియోజకవర్గ పరిధిలోని లక్ష మంది ఓటరు గుర్తింపు కార్డులు సేకరించి నాపై అనర్హత వేటు వేయాలని కోరుతూ వారి పేరుతో లేఖలు పంపే యత్నం చేస్తోంది. ఆ లేఖలు ప్రస్తుతం సాక్షి పత్రిక కార్యాలయంలో ముద్రిస్తున్నట్లుగా నాకు తెలిసింది. ఈ దురుద్దేశపూర్వక చర్యలన్నీ ముఖ్యమంత్రి సూచనలతోనే ప్రభుత్వం చేస్తుందనే విషయాన్ని మీ దృష్టికి తీసుకువస్తున్నాను. ఈ అంశంపై తగిన దృష్టి సారించి నాకు న్యాయం చేయాలని కోరుతున్నా’ అని రఘురామ స్పీకర్‌కు రాసిన లేఖలో పేర్కొన్నారు.