ఓ సాఫ్ట్వేర్ ఉద్యోగి అనుమానాస్పద స్థితిలో చనిపోయిన ఘటన కృష్ణా జిల్లా గ్రామీణ మండలం గ్రామంలో చోటుచేసుకుంది. పశ్చిమ గోదావరి జిల్లా ఆకివీడుకు చెందిన క్రొవ్విడి వెంకట ఈశ్వర సత్య సాయికృష్ణ(34) ఇన్ఫోసిస్‌లో సీనియర్ కన్సల్టెంట్‌గా విధులు నిర్వహిస్తున్నాడు. కరోనా కారణంగా ఇంటి నుంచే పనిచేస్తున్నాడు. ప్రస్తుతం కుటుంబంతో కలిసి నున్నలోని ఏఎస్‌ఎం కాలేజీ రోడ్డులో నివాసముంటున్నారు. మూడు నెలల నుంచి ఇన్ఫోసిస్‌ సీనియర్ కన్సల్టెంట్‌గా పని చేస్తున్నారు. ప్రస్తుతం కరోనా కావడంతో ఇంటి వద్ద నుంచే విధులు నిర్వహిస్తున్నారు. సాయికృష్ణకు గత పదేళ్ల నుంచి మద్యం అలవాటు ఉంది. కరోనా కారణంగా మద్యం సరిగ్గా దొరక్కపోవడంతో మత్తుమాత్రలకు అలవాటు పడ్డాడు. ఆదివారం రాత్రి(జూన్ 27) అధిక మోతాదులో మద్యం తాగిన సాయికృష్ణ గట్టిగా కేకలు వేస్తూ నిద్రపోయారు. మర్నాడు ఉదయం భార్య శిరీష నిద్ర లేపగా అపస్మారక స్థితిలో కనిపించాడు. ఆమె వెంటనే స్థానికుల సాయంతో ఆసుపత్రికి తరలించగా అప్పటికే చనిపోయినట్లు వైద్యులు ధ్రువీకరించారు. మత్తు మాత్రల వినియోగం, మద్యం ఎక్కువ మోతాదులో తాగడం, షుగర్ వ్యాధి తదితర అనారోగ్య సమస్యల కారణంగా తన భర్త చనిపోయాడని మృతుడి భార్య పోలీసులకు ఫిర్యాదు చేశారు. దీంతో పోలీసులు అనుమానాస్పద మృతిగా పోలీసులు కేసు నమోదు చేసి దర్యాప్తు చేస్తున్నారు. సాయికృష్ణ గతేడాది ఏప్రిల్‌లో కొందరు స్నేహితులతో కలిసి ఇంట్లోనే కరోనా స్వీయ పరీక్షలు చేసుకునే కొవిడ్‌ చెక్‌ కొవిడ్‌ డాట్‌ కామ్‌ ఆండ్రాయిడ్‌ వెబ్‌, యాప్‌ను రూపొందించి వార్తల్లోకెక్కారు.
0 Comments