వీడిన మంచిర్యాల రెండు హత్యల మిస్టరీ.. నిందితుడు ఎవరో తెలిసి పోలీసులు షాక్!

జిల్లా కేంద్రంలో జూన్ 18న తల్లీకూతుళ్ల హత్య సంచలనం సృష్టించింది. ఇంట్లో ఒంటరిగా ఉంటున్న తల్లీకూతుళ్లను గుర్తు తెలియని దుండగులు హత్య చేశారు. అయితే, ఆ హత్య జరిగిన పది రోజుల్లో నిందితులను పోలీసులు అరెస్ట్ చేశారు. కాగా ఈ కేసులో ప్రధాన నిందితుడు అల్లుడే కావడం గమనించదగ్గ విషయం. దీనికి సంబంధించిన వివరాలను రామగుండం సీపీ మంగళవారం వెల్లడించారు. మంచిర్యాల జిల్లా కేంద్రంలోని బృందావన్ కాలనీలో పూదరి రవీనా అనే యువతిని ఫేస్‌బుక్ ద్వారా పరిచయం చేసుకొని ఓ యువకుడు 2019లో వివాహం చేసుకున్నాడు. అయితే కొద్ది రోజుల పాటు బాగానే ఉన్నా.. తనను వేధించడంతో పాటు డబ్బులు తెమ్మంటున్నాడని రవీనా పోలీసులకు ఫిర్యాదు చేసింది. దీంతో అరుణ్‌పై వరకట్న కేసును నమోదు చేశారు. దీంతో రవీనా తల్లివద్దే ఉంటుంది. ఈ క్రమంలో తన అత్తే అంతటికి కక్ష పెంచుకున్న అల్లుడు అరుణ్ ఆమెను కడతేర్చేందుకు నిర్ణయించుకున్నాడు. ఆమెను హత్య చేసేందుకు ప్లాన్ వేశాడు. ఇందుకోసం ఆన్‌లైన్‌లోనే సుపారీ తీసుకొనేవారి కోసం వెతికాడు. దీంతో గుంటూరు జిల్లాకు చెందిన రోశయ్య, క్రిష్ణా జిల్లాకు చెందిన వెంకట సుబ్బారావులు ఆన్‌లైన్‌లో పరిచయం అయ్యారు. అయితే హత్య చేసేందుకు అంగీకరించినవారు రూ.పది లక్షలు డిమాండ్ చేశారు. అయితే తన వద్ద అంత డబ్బు లేదని, అత్తగారి ఇంట్లో 20 తులాల బంగారం, నాలుగు లక్షల రూపాయలు ఉన్నాయని వారికి చెప్పాడు. అనంతరం హత్య చేసేందుకు మంచిర్యాలకు పిలిపించాడు. పథకం ప్రకారం జూన్ 18న ఉదయం పది గంటలకు ఇద్దరిని ఉరివేసి హత్య చేశారు. అయితే, పోలీసులు చాకచక్యంగా వ్యవహరించి అల్లుడిని అదుపులోకి తీసుకుని విచారించారు. ఆధారాలతో సహా అరుణ్‌తో పాటు సుపారీ కిల్లర్స్‌ను అరెస్ట్ చేశారు. ఈ విషయాలను కమిషనర్ వి.సత్యనారాయణ మీడియా సమావేశం నిర్వహించి వెల్లడించారు.