బీజేపీ ఎంపీ ధర్మపురి అరవింద్‌కు షాక్.. వాహనంపై దాడి

నిజామాబాద్‌ ఎంపీ ధర్మపురి అర్వింద్‌ వాహనంపై దాడి జరిగింది. కొందరు కోడిగుడ్లతో ఆయన వాహనంపై దాడి చేయడం ఉద్రిక్తతకు దారితీసింది. నిజామాబాద్‌ జిల్లా ఏర్గట్ల మండలం తాళ్లరాంపూర్‌ సహకార సంఘం ఎదుట నిర్వహించ తలపెట్టిన ధర్నాలో పాల్గొనడానికి అర్వింద్‌ సోమవారం గ్రామానికి చేరుకున్నారు. ఈ సందర్భంగా అక్కడ ఉన్న రైతులు, కొందరు టీఆర్ఎస్ నేతలు.. పసుపు బోర్డును ఎప్పుడు ఏర్పాటు చేస్తారంటూ ప్రశ్నించారు. ఎంపీ అరవింద్ వాహనాన్ని అడ్డుకున్నారు. బోర్డ్ ఏర్పాటుకు బాండ్ పేపర్ రాసి ఇచ్చి.. ఇంత వరకు నెరవేర్చలేదంటూ మండిపడ్డారు. ఈ క్రమంలో ఎంపీ.. రైతులతో మాట్లాడడానికి ప్రయత్నిచినా ఫలితం లేకపోయింది. దీంతో బీజేపీ శ్రేణులు కూడా రంగంలోకి దిగడంతో స్వల్పంగా ఘర్షణ వాతావరణం ఏర్పడింది. ఈ సమయంలో టీఆర్‌ఎస్‌ నాయకుడు గడ్డం శ్రీనివాస్‌ కోడిగుడ్డును ఎంపీ వాహనంపైకి విసిరాడు. ఇది ఉద్రిక్తతకు దారితీయడంతో పోలీసులు లాఠీచార్జ్‌ చేసి అందరినీ చెదరగొట్టారు. ఈ ఘటనలో కమ్మర్‌పల్లి బీజేపీ నాయకుడు రంజిత్‌కు గాయాలయ్యాయి. ఈ సందర్భంగా ఎంపీ అరవింద్ మాట్లాడుతూ టీఆర్ఎస్‌పై సంచలన వ్యాఖ్యలు చేశారు. టీఆర్‌ఎస్‌ తన చెప్పుతో సమానమని అర్వింద్‌ మండిపడ్డారు. టీఆర్‌ఎస్‌ ఎమ్మెల్యేలు, మంత్రులు గ్రామాల్లో తిరిగితే బీజేపీ శ్రేణులు అడ్డుకోవాలని కార్యకర్తలకు సూచించారు. సీఎం కేసీఆర్‌ రాష్ట్రానికి పెద్ద కచిరెగాడని, బైంసాలో ముస్లింలతోపాటు హిందువులపై కూడా అక్రమంగా కేసులు నమోదు చేయించారని ఆరోపించారు. జగిత్యాల జిల్లా పొరండ్ల గ్రామంలో సోమవారం ఆయన ఛత్రపతి శివాజీ విగ్రహం ఆవిష్కరించారు. అనంతరం ఎంపీ అర్వింద్‌ మాట్లాడారు.