ఇంగ్లాండ్ స్టార్ ఆల్‌రౌండర్ 2016 నాటి బ్రాత్‌వైట్సిక్సర్లకి తాజాగా బదులు తీర్చుకున్నాడు. టీ20 బ్లాస్ట్‌లో ప్రస్తుతం ఆడుతున్న బెన్‌స్టోక్స్.. వెస్టిండీస్ సీనియర్ ఆల్‌రౌండర్ కార్లోస్ బ్రాత్‌వైట్ వేసిన ఒక ఓవర్‌లో వరుసగా 6,4,0,6 బాదేశాడు. 2016 టీ20 వరల్డ్‌కప్ ఫైనల్లో బెన్‌స్టోక్స్ వేసిన ఆఖరి ఓవర్‌లో బ్రాత్‌వైట్ వరుసగా నాలుగు సిక్సర్లు బాది విండీస్‌ని విశ్వవిజేతగా నిలిపిన విషయం తెలిసిందే. ఆ తర్వాత ఈ ఇద్దరూ ప్రత్యర్థులుగా ఎక్కువగా ఎదురుపడలేదు. టీ20 బ్లాస్ట్‌లో డర్హామ్ టీమ్‌కి బెన్‌స్టోక్స్ ప్రాతినిథ్యం వహిస్తుండగా.. కార్లోస్ బ్రాత్‌వైట్ వార్‌విక్‌షైర్‌కి ఆడుతున్నాడు. ఈ క్రమంలో ఇన్నింగ్స్ 6వ ఓవర్ బౌలింగ్‌కి వచ్చిన బ్రాత్‌వైట్‌కి బెన్‌స్టోక్స్ భారీ షాట్లు ఆడేశాడు. 20 బంతుల్లో బెన్‌స్టోక్స్ 35 పరుగులు చేయగా.. డర్హామ్ టీమ్ నిర్ణీత 20 ఓవర్లలో 8 వికెట్ల నష్టానికి 164 పరుగులు చేసింది. బెన్‌స్టోక్స్ ఇన్నింగ్స్‌లో మూడు సిక్సర్లు, రెండు ఫోర్లు ఉండగా.. బ్రాత్‌వైట్ ఓవర్‌లోనే అతను ఎక్కువగా దూకుడుగా ఆడటం విశేషం. ఐపీఎల్ 2021 సీజన్‌లో రాజస్థాన్ రాయల్స్ తరఫున మ్యాచ్‌లు ఆడిన బెన్‌స్టోక్స్.. ఆరంభంలోనే చేతి వేలి గాయం కారణంగా టోర్నీకి దూరమయ్యాడు. అయితే.. మే 4న టోర్నీ నిరవధికంగా వాయిదా పడగా.. సెప్టెంబరు 19 నుంచి సీజన్‌లో మిగిలిన 31 మ్యాచ్‌లను యూఏఈ వేదికగా బీసీసీఐ నిర్వహించబోతోంది. దాంతో.. ఫామ్ అందుకునే పనిలో స్టోక్స్ బిజీగా ఉన్నాడు.
0 Comments