చిత్తూరులో ఘోర ప్రమాదం.. రెండేళ్ల చిన్నారి సహా భార్యభర్తలు మృతి

చిత్తూరు జిల్లాలో శనివారం అర్ధరాత్రి ఘోర రోడ్డు ప్రమాదం సంభవించింది. ఈ ప్రమాదంలో ముగ్గురు అక్కడికక్కడే ప్రాణాలు కోల్పోయారు. ఈ దుర్ఘటన మదనపల్లిలోని బిస్కెట్‌ ఫ్యాక్టరీ దగ్గర చోటుచేసుకుంది. ద్విచక్రవాహనంపై వెళ్తోన్నవారికి గుర్తు తెలియని వాహనం ఢీకొట్టింది. దీంతో రెండేళ్ల చిన్నారి సహా తల్లిదండ్రులు మృతి చెందారు. వీరు కర్ణాటక నుంచి కుర్గేపల్లెకు వెళ్లి వస్తుండగా ప్రమాదం జరిగింది. ప్రమాదం గురించి సమాచారం అందుకున్న పోలీసులు ఘటనా స్థలానికి చేరుకుని సహాయక చర్యలు చేపట్టారు. మృతులను మదనపల్లెకు చెందిన నరేష్ (32), ఉమాదేవి (27), చిన్నారి నిషిత (2)గా పోలీసులు గుర్తించారు. ఘటనలో రెండేళ్ల చిన్నారి మృత్యువాత పడటం కలకలం సృష్టించింది. ప్రమాదం రాాత్రివేళ జరగడం వల్ల ఆలస్యంగా సమాచారం అందింది. కేసు నమోదుచేసిన పోలీసులు దర్యాప్తు చేపట్టారు. ప్రమాదానికి కారణమైన వాహనం కోసం గాలిస్తున్నారు. మృతదేహాలను స్వాధీనం చేసుకుని పోస్ట్‌మార్టం కోసం తరలించారు. ప్రమాదానికి కారణమైన వాహనం గుర్తించే పనిలో ఉన్నారు. దానిని గుర్తించేందుకు సమీపంలోని సీసీటీవీలను పరిశీలిస్తున్నారు. స్వంత పనులపై కుమార్తెను వెంటబెట్టుకుని కూర్గేపల్లెకు వెళ్లిన భార్యభర్తలు.. శనివారం తిరిగి వస్తుండగా.. బెంగుళూరు రోడ్డు బిస్కెట్ ప్యాక్టరీ వద్ద గుర్తుతెలియని వాహనం ఢీకొందని పోలీసులు తెలిపారు. ముగ్గురి తలకు బలమైన గాయాలయ్యాని, దీంతో ప్రాణాలు కోల్పోయారని పేర్కొన్నారు.