కుల్దీప్ యాదవ్ ఫెయిల్యూర్‌కి అసలు కారణం చెప్పిన మైకేల్ వాన్

టీమిండియా మణికట్టు స్పిన్నర్ గత రెండేళ్లుగా పేలవ ఫామ్‌తో నిరాశపరుస్తున్నాడు. అంతర్జాతీయ క్రికెట్‌లో ఒకప్పుడు అన్ని ఫార్మాట్లలోనూ రెగ్యులర్ ఆటగాడిగా కనిపించిన కుల్దీప్ యాదవ్.. ఇప్పుడు ఏ ఫార్మాట్‌లోనూ కనీసం స్థాయికి తగిన ప్రదర్శన కూడా కనబర్చలేకపోతున్నాడు. మాజీ కెప్టెన్ మహేంద్రసింగ్ ధోనీ.. టీమ్‌లో లేకపోవడమే కుల్దీప్ యాదవ్ తడబాటుకి కారణమని ఇంగ్లాండ్ మాజీ కెప్టెన్ మైకేల్ వాన్ అభిప్రాయపడ్డాడు. ఇంగ్లాండ్‌తో ఇటీవల ముగిసిన సుదీర్ఘ సిరీస్‌లో కుల్దీప్ యాదవ్‌కి పెద్దగా అవకాశాలు దక్కలేదు. గత ఆదివారం ముగిసిన మూడు వన్డేల సిరీస్‌లో ఫస్ట్ రెండు మ్యాచ్‌ల్లోనూ కుల్దీప్ యాదవ్‌ని టీమిండియా ఆడించగా.. అతను 9-0-68-0, 10-0-84-0 గణాంకాలతో నిరాశపరిచాడు. ఏమాత్రం వేరియేషనల్ లేని అతని బౌలింగ్‌లో బెన్‌స్టోక్స్ హ్యాట్రిక్ సిక్సర్లు బాదేశాడు. రెండో వన్డేలో అతని కారణంగానే ఇంగ్లాండ్ చేతిలో టీమిండియా ఓడిపోయిందనే అభిప్రాయాలూ వినిపించాయి. దాంతో.. మూడో వన్డేలో అతనిపై వేటు పడింది. ‘‘మహేంద్రసింగ్ ధోనీ వికెట్ల వెనుక నుంచి అతనికి సహకరిస్తున్నప్పుడు.. కుల్దీప్ యాదవ్ వ్యూహాత్మకంగా బౌలింగ్ చేసేవాడు. కానీ.. గత రెండేళ్ల నుంచి అతని బౌలింగ్‌లో ఏమాత్రం మార్పు కనిపించడం లేదు. అతను విసిరే స్లో గూగ్లీలు వర్క్‌వుట్ అవడం లేదు. సులువుగా అతని బౌలింగ్‌ని ప్రత్యర్థి బ్యాట్స్‌మెన్‌లు రీడ్ చేస్తున్నారు. ధోనీ లేకపోవడంతో అతని బౌలింగ్‌లో వైవిధ్యం దెబ్బతింది. దాంతో.. టచ్ కోల్పోయాడు’’ అని మైకేల్ వాన్ చెప్పుకొచ్చాడు. అంతర్జాతీయ క్రికెట్‌కి 2020, ఆగస్టు 15న ధోనీ రిటైర్మెంట్ ప్రకటించగా.. అతను 2019 వన్డే ప్రపంచకప్‌ నుంచి ఇంటర్నేషనల్ క్రికెట్‌కి దూరంగా ఉండిన విషయం తెలిసిందే.