టీమిండియా యువ హిట్టర్ ఈ ఏడాది జనవరి నుంచి కెరీర్ బెస్ట్ ఫామ్‌ని కనబరుస్తున్నాడు. ఆస్ట్రేలియా‌తో జరిగిన టెస్టు సిరీస్‌లో వీరోచిత ఇన్నింగ్స్‌లతో ఆకట్టుకున్న రిషబ్ పంత్.. ఇంగ్లాండ్‌తో గత ఆదివారం ముగిసిన సుదీర్ఘ సిరీస్‌లోనూ చక్కటి ప్రదర్శన కనబర్చాడు. దాంతో.. ఇప్పుడు మూడు ఫార్మాట్లలోనూ రిషబ్ పంత్ రెగ్యులర్‌ ఆటగాడిగా మారిపోయాడు. అతను లేని భారత్ జట్టుని ఊహించుకోలేకపోతున్నానని ఇంగ్లాండ్ మాజీ క్రికెటర్ ఇయాన్ బెల్ చెప్పుకొచ్చాడు. ‘‘రిషబ్ పంత్‌కి మంచి భవిష్యత్ ఉంది. ఇలాంటి వరల్డ్ క్లాస్ ప్లేయర్లు చాలా తక్కువ మంది ఉంటారు. ఇటీవల అతని ఆటలో పరిణతి కనిపిస్తోంది. పంత్ ఇప్పుడే తన అసలైన ఆటని మొదలెట్టాడు.. అతనికి మంచి కెరీర్ ఉంటుంది. పంత్ ఓ మ్యాచ్ విన్నర్. ఇప్పుడు అతను లేని టీమిండియాని ఊహించుకోలేకపోతున్నా’’ అని ఇయాన్ బెల్ వెల్లడించాడు. ఫార్మాట్ ఏదైనా దూకుడుగా ఆడేస్తున్న రిషబ్ పంత్.. ఐపీఎల్ 2021 సీజన్‌లో ఢిల్లీ క్యాపిటల్స్ తరఫున మ్యాచ్‌లు ఆడబోతున్నాడు. ఏప్రిల్ 9 నుంచి మే 30 వరకూ ఐపీఎల్ 2021 సీజన్ మ్యాచ్‌లు జరగనుండగా.. కెప్టెన్ శ్రేయాస్ అయ్యర్ గాయపడిన నేపథ్యంలో రిషబ్ పంత్‌ని కెప్టెన్‌గా నియమించాలనే డిమాండ్ కూడా వినిపిస్తోంది.
0 Comments