శ్రేయాస్ అయ్యర్‌కి సర్జరీ.. క్రికెట్‌కి ఎన్ని రోజులు దూరమంటే..?

టీమిండియా మిడిలార్డర్ బ్యాట్స్‌మెన్ శ్రేయాస్ అయ్యర్‌ భుజానికి వైద్యులు సర్జరీ చేయబోతున్నారు. ఇంగ్లాండ్‌తో ఇటీవల పుణె వేదికగా జరిగిన తొలి వన్డేలో బౌండరీ లైన్ వద్ద ఫీల్డింగ్ చేస్తూ శ్రేయాస్ అయ్యర్ గాయపడ్డాడు. బంతిని నిలువరించే క్రమంలో డైవ్ చేసిన శ్రేయాస్ అయ్యర్.. తన శరీర బరువు మొత్తాన్ని ఎడమ భుజంపై మోపేశాడు. దాంతో.. భుజం స్థానభ్రంశమైంది. ఆ వెంటనే ఫిజియో అతడ్ని మైదానం వెలుపలికి తీసుకెళ్లాడు. భుజం గాయం తీవ్రత కారణంగా ఇంగ్లాండ్‌తో తర్వాత రెండు వన్డేలకి దూరంగా ఉన్న శ్రేయాస్ అయ్యర్.. ఏప్రిల్ 9 నుంచి మే 30 వరకూ జరగనున్న ఐపీఎల్ 2021 సీజన్‌‌కీ దూరమయ్యాడు. అతని భుజానికి ఏప్రిల్ 8న సర్జరీ చేయనున్నట్లు తెలుస్తోంది. వాస్తవానికి సర్జరీ వైద్యుల ఫస్ట్ ఛాయిస్ కాదు. కానీ.. గాయం తీవ్రతని పరిశీలించిన తర్వాత సర్జరీ మినహా మరో ఆప్షన్ లేదని అతనికి వైద్యులు సూచించినట్లు తెలుస్తోంది. సర్జరీ తర్వాత శ్రేయాస్ అయ్యర్ పూర్తి స్థాయిలో కోలుకునేందుకు కనీసం 120-150 రోజుల సమయం పడుతుందని వైద్యులు అంచనా వేస్తున్నారు. ఐపీఎల్‌‌లో ఢిల్లీ క్యాపిటల్స్ టీమ్‌కి కెప్టెన్ ఉన్న శ్రేయాస్ అయ్యర్.. ఈ ఏడాది సీజన్‌కి దూరమవడంతో అతని స్థానంలో ఎవరిని కెప్టెన్‌గా నియమించాలి..? అనేదానిపై ఢిల్లీ క్యాపిటల్స్ ఫ్రాంఛైజీ తర్జనభర్జనలు పడుతోంది. టీమ్‌లో కెప్టెన్‌గా అనుభవం ఉన్న స్టీవ్‌స్మిత్, రవిచంద్రన్ అశ్విన్ ఉన్నప్పటికీ.. యువ హిట్టర్ రిషబ్ పంత్, సీనియర్ ఓపెనర్ శిఖర్ ధావన్ పేర్లు ప్రముఖంగా వినిపిస్తున్నాయి. ఈ వారంలోనే కెప్టెన్‌ విషయంలో తుది నిర్ణయం వెలువడే అవకాశం ఉంది.