అనంతపురం వస్తా.. తాడో, పేడో తేల్చుకుందాం.. ప్రియాంకతో బాలయ్య సంభాషణ

అనంతపురంలో తెలుగు మహిళ పార్లమెంట్ ప్రధాన కార్యదర్శి ప్రియాంక ఆత్మహత్యాయత్నం కలకలంరేపింది. జగన్‌ సర్కార్‌తో పాటు వైసీపీ లీడర్లపై అనుచిత వ్యాఖ్యలు చేశారని ఆమెపై కేసు నమోదైంది. ప్రియాంక ఆచూకీ కోసం గాలించారు.. చివరికి బంధువుల ఇంట్లో ఉందన్న విషయం తెలుసుకున్న పోలీసులు.. ప్రియాంకను అదుపులోకి తీసుకునేందుకు ప్రయత్నించారు. ఇంతలో ఏమైందో ఏమో ఆమె పురుగుల మందు తాగారు. వెంటనే ఆమెను ఆస్పత్రికి తరలించారు. పోలీసుల వేధింపులతోనే ప్రియాంక పురుగుల మందు తాగారని టీడీపీ నేతలు ఆరోపించారు. ఆమెను సకాలంలో ఆసుపత్రికి తీసుకురావడంతో ప్రాణాపాయం తప్పిందని డాక్టర్లు చెప్పారు. ఈ క్రమంలో ప్రియాంక భర్త శ్రీధర్‌కు హిందూపురం ఎమ్మెల్యే ఫోన్ చేసి పరామర్శించారు. కొన్ని పనులతో బిజీగా ఉన్నానని.. త్వరలోనే వచ్చి కలుస్తానని.. తాను అండగా ఉంటానని ధైర్యం చెప్పారు. ప్రియాంక త్వరగా కోలుకోవాలని ఆకాంక్షించారు. ప్రియాంక పోరాటం ఎంతోమందికి ఆదర్శమన్నారు బాలయ్య. ఇలాంటి ఘటన జరగడం బాధాకరమని.. ఇక తాడో పేడో తేల్చుకోవాలన్నారు. భగవంతుడు ఉన్నాడని చూస్తూ కూర్చుంటే ఇంకా ఇలాంటివి జరుగుతాయన్నారు.. మంచి రోజులొస్తాయని.. పోరాటాన్ని కొనసాగిద్దామన్నారు. త్వరలోనే మనం అంటే ఏమిటో చూపిద్దామన్నారు. బాలయ్య ప్రియాంక, ఆమె భర్తతో మాట్లాడిన ఆడియో సోషల్ మీడియాలో వైరల్ అవుతోంది.