న్యూజిలాండ్‌తో టీ20 వరల్డ్‌కప్ మ్యాచ్ ముంగిట టీమిండియా కెప్టెన్ సీరియస్‌గా కొంత మంది నెటిజన్లకి వార్నింగ్ ఇచ్చాడు. ఇటీవల పాకిస్థాన్‌తో జరిగిన మ్యాచ్‌లో మహ్మద్ షమీ చివర్లో లయ తప్పి ధారాళంగా పరుగులిచ్చేయడంతో.. కొంత మంది నెటిజన్లు అతడ్ని మతం పేరిట ట్రోల్స్ చేస్తూ తీవ్ర స్థాయిలో విమర్శలు గుప్పించారు. దాంతో.. భారత తాజా, మాజీ క్రికెటర్లు అతనికి మద్దతుగా నిలిచి.. ఆ విమర్శల్ని తిప్పికొట్టారు. కానీ.. ఇలా ఓ మనిషిని మతం పేరిట విమర్శించడం తగదని విరాట్ కోహ్లీ హెచ్చరించాడు. భారత్, న్యూజిలాండ్ మధ్య దుబాయ్ వేదికగా ఆదివారం రాత్రి 7.30 గంటలకి మ్యాచ్ జరగనుంది. ‘సోషల్ మీడియాలో పనిలేని వ్యక్తులు ఇలా మనిషిని నేరుగా నిలదీసే దమ్ములేక.. మతం పేరిట మనుషులపై దాడి చేస్తుంటారు. ఇది చాలా దారుణమైన విషయం. నిజమే.. ప్రతి ఒక్కరికీ మాట్లాడే స్వేచ్ఛ ఉంటుంది. కానీ.. ఇలా మతం అడ్డుపెట్టుకుని దూషిస్తారా..? నేను ఎప్పుడూ ఇలా చేయలేదు. మహ్మద్ షమీ ఎన్నో మ్యాచ్‌ల్లో భారత్ జట్టుని గెలిపించాడు. కానీ.. అవన్నీ మరిచిపోయి విమర్శిస్తున్నారు. అలాంటి వారి గురించి మాట్లాడి ఒక్క నిమిషం కూడా వేస్ట్ చేసుకోను. షమీ అనే కాదు.. టీమిండియాలో ఎవరిపై విమర్శలు వచ్చినా నేను ఇలాగే మాట్లాడతా’’ అని కెప్టెన్ విరాట్ కోహ్లీ స్పష్టం చేశాడు. టీమిండియాలో గత కొంతకాలంగా మూడు ఫార్మాట్లలోనూ రెగ్యులర్ ఆటగాడిగా మారిపోయిన మహ్మద్ షమీని.. న్యూజిలాండ్‌తో మ్యాచ్‌లోనూ ఆడించడం లాంఛనంగా కనిపిస్తోంది. న్యూజిలాండ్ కెప్టెన్ కేన్ విలియమ్సన్‌ని ఇంటర్నేషనల్ టీ20ల్లో నాలుగు సార్లు ఔట్ చేసిన రికార్డ్ షమీకి ఉంది. విలియమ్సన్‌కి ఇంటర్నేషనల్ టీ20ల్లో ఇప్పటి వరకూ 37 బంతులు విసిరిన షమీ.. 49 పరుగులిచ్చి నాలుగు సార్లు పెవిలియన్ బాట పట్టించాడు.
0 Comments