న్యూజిలాండ్‌తో టీ20 వరల్డ్‌కప్ మ్యాచ్ ముంగిట టీమిండియాకి ఊహించని విధంగా ఓ వార్నింగ్ వచ్చింది. దుబాయ్ వేదికగా ఆదివారం రాత్రి 7.30 గంటలకి మ్యాచ్ జరగనుండగా.. పాకిస్థాన్ ఫాస్ట్ బౌలర్ షాహీన్ అఫ్రిది తరహాలో స్వింగ్‌తో వణికిస్తానని టీమిండియా టాప్ ఆర్డర్‌కి న్యూజిలాండ్ ఫాస్ట్ బౌలర్ హెచ్చరించాడు. గత ఆదివారం భారత్, పాకిస్థాన్ జట్లు తలపడగా.. మ్యాచ్ ఆరంభంలోనే రోహిత్ శర్మ, కేఎల్ రాహుల్‌ని తన పేస్, స్వింగ్‌తో బోల్తా కొట్టించిన షాహీన్ అఫ్రిది.. స్లాగ్ ఓవర్లలో విరాట్ కోహ్లీని కూడా ఔట్ చేసేశాడు. దాంతో.. అదే తరహాలో ఛాలెంజ్‌కి సిద్ధంగా ఉండాలని టీమిండియాకి ట్రెంట్ బౌల్ట్ ఛాలెంజ్ విసిరాడు. ‘‘ఎడమచేతి వాటం పేసరైన షాహీన్ అఫ్రిది ఆరోజు అద్భుతంగా బౌలింగ్ చేశాడు. నేను కూడా అదేరీతిలో బంతిని స్వింగ్ చేయగలను. ఆరోజు టీమిండియాపై షాహీన్ అఫ్రిది ఎలా చేశాడో.. నేను కూడా అదే సీన్‌ని రిపీట్ చేస్తా. భారత్ జట్టులో క్వాలిటీ బ్యాట్స్‌మెన్‌లు ఉన్నారు. కాబ్టటి.. ఆరంభంలోనే వికెట్ల తీయడంపై ఫోకస్ చేస్తాం’’ అని ట్రెంట్ బౌల్ట్ చెప్పుకొచ్చాడు. షాహీన్ అఫ్రిది తరహాలో ట్రెంట్ బౌల్ట్ కూడా ఎడమచేతి వాటం పేసర్‌కాగా.. కొత్త బంతితో అతను అద్భుతంగా స్వింగ్ రాబట్టగలడని రికార్డులు చెప్తున్నాయి. ఐపీఎల్ 2021 సీజన్‌లోనూ పవర్‌ప్లేలో రెగ్యులర్‌గా బౌల్ట్ వికెట్లు పడగొట్టాడు. ట్రెంట్ బౌల్ట్ వార్నింగ్‌కి టీమిండియా కెప్టెన్ విరాట్ కోహ్లీ కౌంటరిచ్చాడు. ‘‘షాహీన్ అఫ్రిది తరహాలో స్వింగ్‌తో సవాళ్లు విసురుతానంటే.. అది కచ్చితంగా మాలో కసి పెంచుతుంది. మేము ఎదురుదాడితో అతడ్ని ఒత్తిడిలోకి నెడతాం. గత కొన్నేళ్లుగా న్యూజిలాండ్ బౌలర్లని మేము ఎదుర్కొంటున్నాం. కాబట్టి.. మేము ఆత్మవిశ్వాసంతోనే బరిలోకి దిగుతాం’’ అని కోహ్లీ చెప్పుకొచ్చాడు.
0 Comments