హుజురాబాద్ పోలింగ్‌కు సర్వం సిద్ధం.. బరిలో 30 మంది

దేశవ్యాప్తంగా ఉత్కంఠ రేపిన హుజురాబాద్ ఉపఎన్నికకు అన్ని ఏర్పాట్లు పూర్తయ్యాయి. ఓటర్లు తమ తీర్పు చెప్పేందుకు సిద్ధమయ్యారు. ఈ రోజు ఉదయం 7గంటలకు ప్రారంభమయ్యే పోలింగ్ సాయంత్రం 7 గంటల వరకు జరగనుంది. ఈ పోటీలో 30 మంది అభ్యర్థులు పోటీలో నిలవగా.. 2లక్షల 37వేల 36 మంది ఓటర్లు తమ ఓటుహక్కు వినియోగించుకోనున్నారు. హుజురాబాద్‌ బరిలో 30 మంది ఉన్నప్పటికీ పోటీ మాత్రం టీఆర్ఎస్ అభ్యర్థి గెల్లు శ్రీనివాస్ యాదవ్, బీజేపీ అభ్యర్థి ఈటల రాజేందర్, కాంగ్రెస్ అభ్యర్థి బల్మూరు వెంకట్ మధ్యే ఉంది. ఈ ఉప ఎన్నిక పోలింగ్‌ కోసం పోలీసులు పటిష్ట బందోబస్తు ఏర్పాటు చేశారు. చాలా చోట్ల చెక్‌పోస్టులు పెట్టి వాహనాలను తనిఖీలు చేస్తున్నారు. 20 కంపెనీల కేంద్ర బలగాలు, 4 వేల మంది రాష్ట్ర పోలీసులు బందోబస్తులో ఉన్నారు. పోలింగ్ కోసం మొత్తం 306 పోలింగ్ కేంద్రాలను సిద్ధం చేశారు. వీటిలో 172 కేంద్రాలను సమస్యాత్మకమైనవిగా, 63 అత్యంత సమస్యాత్మకమైనవిగా గుర్తించి అదనపు భద్రత కల్పిస్తున్నారు. ఓటింగ్‌ పూర్తికాగానే ఈవీఎంలను, వీవీ ప్యాట్లను కరీంనగర్‌ జిల్లా కేంద్రంలోని ఎస్సారార్‌ ప్రభుత్వ డిగ్రీ, పీజీ కాలేజీకి తరలిస్తారు. వీటిని భద్రపరిచేందుకు ఇప్పటికే ఏర్పాట్లను పూర్తి చేశారు. నవంబరు 2న ఇక్కడే ఓట్ల లెక్కింపు జరగనుంది