ఎన్ని చర్యలు తీసుకుంటున్నా నగరంలో రోడ్డుప్రమాదాలు అదుపులోకి రావడం లేదు. హెల్మెట్ ధరించకపోవటం, రాంగ్‌రూట్‌, ఓవర్‌ స్పీడ్, డ్రంకన్ డ్రైవింగ్, సిగ్నల్ జంపింగ్ వంటి ట్రాఫిక్ ఉల్లంఘనలతో ప్రమాదాలు రోజురోజుకీ పెరుగుతున్నట్లు గుర్తించిన ట్రాఫిక్ పోలీసులు అధికారులు పదేపదే నిబంధనలు ఉల్లంఘిస్తున్నవారి లైసెన్స్‌ రద్దు చేసేందుకు రవాణాశాఖకు సిఫార్సు చేస్తున్నారు. ఈ నేపథ్యంలోనే గ్రేటర్‌ పరిధిలో ఈ ఏడాది 10 నెలల వ్యవధిలో సుమారు 4030 మంది లైసెన్స్‌లను సస్పెండ్‌ చేశారు. మరో 2000-2200 మంది నిబంధనల ఉల్లంఘనులకు షోకాజ్‌ నోటీసులు జారీచేసినట్టు సమాచారం. 2018లో 3 కమిషనరేట్ల పరిధిలో 2200 వరకూ లైసెన్స్‌లు తాత్కాలిక రద్దు చేయగా.. 2021 నాటికి అది రెట్టింపు కావటం పరిస్థితి తీవ్రతకు అద్దం పడుతోందని ట్రాఫిక్ పోలీసులు చెబుతున్నారు. సైబరాబాద్‌ పరిధిలోనే ఈ ఏడాది అధికంగా 2294 లైసెన్స్‌లు సస్పెండ్‌ అయ్యాయి. వీరిలో 70-75శాతం వరకు యువతే ఉంటున్నారని రవాణాశాఖ అధికారులు తెలిపారు. 3-6 నెలల లోపు లైసెన్స్‌ సస్పెన్షన్‌ సమయం ఉంటుందన్నారు. గడువు ముగిసిన తర్వాత లిఖితపూర్వకంగా రాసిచ్చి తమ డ్రైవింగ్ లైసెన్స్‌లు తీసుకెళ్తున్నట్టు పేర్కొన్నారు.
0 Comments